16 yaşlı bir uşaq, bacısını evlənmək məqsədilə qaçıran gənci tapança ilə sinəsindən vuraraq öldürüb.
“Şərq” xəbər verir ki, Samsunun İlkadım rayonunda baş verən hadisədə iddiaya görə, 16 yaşlı M.T., bacısını evlənmək məqsədilə qaçıran 24 yaşlı Okan Doğan Torun ilə danışmaq üçün onun işlədiyi yerə gəlib.
Burada başlayan mübahisə qısa müddətdə böyüyüb. M.T., üzərindəki tapança ilə Okan Doğan Torunu sinəsindən vuraraq ağır yaralayıb.
Yaralı halda hadisə yerindən qaçan Okan Doğan Torun yaxınlıqdakı bir kitab mağazasına sığınıb.
Bu zaman əlində tapança ilə küçə boyu Torunu təqib edən M.T., yenidən atəş açıb.
Atılan güllələrdən biri mağazanın qarşısında oturan D.A.-ya dəyib və onun ayağından yaralanmasına səbəb olub.
Hadisə yerinə çağırılan təcili tibbi yardım qrupları yaralıları təcili olaraq Samsun Təhsil və Araşdırma xəstəxanasına çatdırıblar.
Sinəsindən vurulan Okan Doğan Torun bütün müdaxilələrə baxmayaraq xilas edilə bilməyib və həyatını itirib.
Şübhəli M.T. hadisədə istifadə etdiyi tapança ilə birlikdə polis tərəfindən qısa müddət ərzində saxlanılıb və nəzarətə alınıb.
Hadisə ilə bağlı istintaq başladılıb.
