Əgər kimsə Azərbaycana təzyiqlə nəyəsə nail olacağını düşünürsə, çox yanılır
Avropa Şurasının Baş katibi Alen Berse Ermənistan və Azərbaycan arasında razılaşdırılmış sülh sazişinin imzalanmasından danışıb. Berse Ermənistanın bu istiqamətdə olduqca vacib addımlar atdığını iddia edib. Eyni zamanda Avropa Şurasının dialoq platforması təklif etmək niyyətini açıqlayıb. Vurğulayıb ki, bu məsələni sürətləndirmək üçün Azərbaycana dostcasına təzyiq göstərməyə də hazırdırlar: "Bu mövzu bizi çoxdan maraqlandırır. Baş nazir Paşinyanla hələ çox əvvəl, Ermənistanın sazişin şərtlərini qəbul etdiyi vaxtdan danışmışam. Fürsətim olub, Azərbaycan hakimiyyəti ilə də bu barədə danışmışam". Bersenin sözlərinə görə, məqsədləri bu məsələnin əhəmiyyətini xatırlatmaq, müzakirələri davam etdirmək və nəhayət, son nöqtəyə çatmaqdır".
AŞ rəhbərliyinin yanaşmasını Sherg.az-a təhlil edən millət vəkili Ceyhun Məmmədov vurğulayıb ki, əgər kimsə Azərbaycana təzyiqlə nəyəsə nail olacağını düşünürsə, çox yanılır. Deputatın sözlərinə görə, hər hansı dövlətin Bakıya basqılar üzərindən nəyəsə nail olması qeyri-mümkündür:
"Azərbaycan Avropa təsisatları ilə dəfələrlə müxtəlif formalarda əməkdaşlıq qurmaq təşəbbüslərini ortaya qoyub. Amma təəssüf ki, Ermənistan buna getməyib. Əksər beynəlxalq təşkilatlar da Ermənistanın haqsız mövqeyini dəstəkləyiblər. Halbuki, sülhü istəyən, sülhə doğru həqiqi və səmimi addımlar atan, bu istiqamətdə real işlər görən ölkə məhz Azərbaycan olub. Ermənistan isə hər vəchlə sülh prosesinə mane olmağa çalışıb, müxtəlif bəhanələrlə prosesi uzatmağa cəhd göstərib. Azərbaycan hər zaman sülhə hazır olub, bu gün də hazırdır. Yaxşı olar ki, Avropa Şurası sülhü sürətləndirmək üçün ilk növbədə pozucu Ermənistana, İrəvan hökumətinə təzyiq göstərsin. Çünki sülhdən qaçan Ermənistandır, Azərbaycan deyil".
