ABŞ-ın Hərbi Dəniz Donanması Ali Məktəbinin professoru Brenda Şafer Çikaqo şəhərində yaşayan Güney azərbaycanlı, GunAzTV-nin rəhbəri Əhməd Obalıya qarşı hücumu kəskin pisləyib.
“Report” xəbər verir ki, o, bu barədə tviterdəki hesabında yazıb.
“İran qətlin astanasındadır. Son iki həftə ərzində İranda 60-dan çox adam, o cümlədən İsveç vətəndaşı Həbib Çaab edam edilib. Bu həftəsonu Kaliforniyada Əhməd Obalıya sui-qəsd cəhdi olub. Obalı Çikaqodan İrana yayımlanan televiziya kanalını idarə edir”, - Brenda Şafer qeyd edib:
“Son iki həftədə İranda edam edilənlərin əksəriyyəti etnik azlıqlardandır”.
O, qeyd edib ki, həyatına sui-qəsd edilən Əhmad Obalı Kaliforniyadakı azərbaycanlıların rəhbəridir: “İran rejimi ABŞ və avropalılara hücum etməkdən çəkinmir”.
Xatırladaq ki, Əhməd Obalı ötən gün bir neçə nəfərin hücumuna məruz qalıb. O, hücum zamanı ağır xəsarətlər alıb. Hazırda durumu orta-ağırdır.
Hadisə ilə bağlı araşdırma aparılır.
