Azərbaycan təhlükəsizlik və siyasi çağırışlara cavab verəcək yeni siyasi mərhələyə başlayır
Azərbaycan son günlər dost və tərəfdaş ölkələrlə diplomatik əlaqələri və danışıqları intensivləşdirib. Beynəlxalq aləmdə və regionda siyasi proseslər hər keçən gün dəyişir.
Rusiya-Ukrayna müharibəsi, ABŞ-nin Prezidenti Donald Trampın apardığı siyasət beynəlxalq müstəvidə yeni siyasi nizamı ciddi şəkildə redaktə edir. Hər bir ölkənin təhlükəsizlik qayğıları və riskləri artıb. Prezidentin köməkçisi Hikmət Hacıyevin Türkiyə ilə yanaşı, İsrail və Böyük Britaniyaya səfərləri Azərbaycanla bu ölkələr arasında siyasi və təhlükəsizlik əlaqələrinin daha da inkişaf etdirilməsinə xidmət edir.
Politoloq Məhəmməd Əsədullazadə "Sherg.az"a deyib ki, Azərbaycan yeni təhlükəsizlik və siyasi çağırışlara cavab verəcək yeni siyasi mərhələyə başlayır:
"ABŞ Prezidenti D.Trampın Qarabağ erməniləri ilə bağlı açıqlamaları olub. Erməni lobbisi və Kilkiya erməni Bas keşişi Aramla Tramp arasında iki dəfə danışıq baş tutub. Hazırda erməni lobbisi Ağ Evin yeni komandası ilə əlaqələri yaxşılaşdırmağa çalışır. Azərbaycan erməni lobbisindən daha çevik olmalı və Bayden administrasiyasından fərqli olaraq, Trampın Ermənistana dəstəyinin vaxtında qarşısını almalıdır. Rəsmi Bakının ABŞ-nin Azərbaycana qarşı "907-ci düzəliş" sanksiyasını qaldırması və siyasi əlaqələri inkişaf etdirmək üçün mümkün olan siyasi vasitələri inkişaf etdirməsi labüddür. Tramp və administrasiyası İsrailə böyük rəğbət bəsləyir. İsrailin Knesset üzvləri və bir neçə Ravvin Azərbaycanla bağlı Ağ Evə müraciət edib. Ünvanlanan müraciətin Ağ Evdə müsbət qarşılığının olacağı ehtimalı mümkündür. Donald Trampla əlaqələri inkişaf etdirmək Azərbaycana mümkün risklərin qarşısını almağa kömək edə bilər. Ünvanlanan müraciətdə Azərbaycanın da "İbrahim sazişinə" qoşulması təklif edilib. Məhz "İbrahim sazişi" Trampın layihəsidir. Bununla Azərbaycanın tərəfdaş və etimadlı bir ölkə olduğu Ağ Evin diqqətinə çatdırılır".
Analitik vurğulayıb ki, Böyük Britaniya ilə əlaqələr də Azərbaycan üçün xüsusi əhəmiyyət kəsb edir:
"Türkiyə, Böyük Britaniya və İsrail Azərbaycanın yaxın strateji tərəfdaşıdır. Azərbaycan xarici siyasətdə çox uğurlu işlər aparır. Məhz bunun nəticəsində Azərbaycana yaxın perspektivdə ciddi siyasi təzyiqlər gözlənilmir. Azərbaycan həm müsəlman ölkələri və türk dövlətləri ilə yanaşı, Böyük Britaniya, İsrail, ABŞ ilə də siyasi əlaqələri koordinasiya etməyə çalışır. Bu diplomatik hərəkətlilik Azərbaycana Ermənistan üzərində siyasi basqıları artıracaq".
