ABŞ Ukraynaya təbii ehtiyatlarla bağlı müqavilə layihəsi təqdim edib və bu razılaşma Münxen konfransında əldə edilə bilər.
“Report” “Novını.LIVE”a istinadən xəbər verir ki, bu barədə Ukrayna Prezidenti Voldimir Zelenski bildirib.
O, ABŞ-nin maliyyə naziri Skott Bessent ilə məhsuldar və konstruktiv danışıqlar apardığını və təbii ehtiyatlarla bağlı potensial müqavilənin ilk layihəsini əldə etdiyini qeyd edib.
“Bilirəm ki, komandamıza Birləşmiş Ştatlardan ölkələrimiz arasında tərəfdaşlıq haqqında müqavilənin ilk layihəsi təqdim edilib. Komandamızın bu sənədi incələməsini çox istəyirəm və biz bu sənədi mümkün qədər tez incələmək və imzalamaq üçün əlimizdən gələni edəcəyik”, – Zelenski söyləyib.
Ukrayna lideri əlavə edib ki, müqavilə bu həftənin sonunda Münxen konfransında əldə edilə bilər: “Birləşmiş Ştatlar bizim əsas tərəfdaşımızdır. Biz sənədin bütün detallarını öyrənmək və Münxen konfransına çatmaq üçün əlimizdən gələni edəcəyik, çünki vaxt itirmək istəmirik”.
Daha əvvəl “New York Post” yazmışdı ki, Ukrayna Vaşinqtonun Kiyevə göstərdiyi hərbi yardımın ödənişi kimi ABŞ-yə 500 milyard dollar dəyərində nadir torpaq metalları verməyə “əsasən razılaşıb”.
Zelenskinin sözlərinə görə, Ukrayna ərazilərini Rusiyadan təkcə təhlükəsizlik baxımından deyil, həm də maliyyə baxımından qorumaq vacibdir. Əks halda “nadir torpaq metalları” da daxil olmaqla vacib faydalı qazıntılar rusiyalılara pulsuz çatacaq.
