Azərbaycan və regionda da ChatGPT-dən istifadə artmaqdadır və bu, insanların rəqabətdə irəli çıxmaq üçün süni intellekti yeni imkan kimi gördüklərini göstərir.
“APA-Economics” xəbər verir ki, bunu Bakıda keçirilən tədbirdə OpenAI şirkətinin məsləhətçisi, şirkətin keçmiş departament rəhbəri Zak Kass deyib.
O ümumilikdə hazırda süni intellekt sahəsində üç əsas trend müşahidə edildiyini açıqlayıb.
Onun sözlərinə görə, ilk mühüm trend süni intellekt modellərinin istifadəsi zamanı xərclərin – yəni “inference costs” – sürətlə azalmasıdır: “İnternetin ucuzlaşması sayəsində inkişaf etməkdə olan ölkələr sürətlə inkişaf edə bildilər. İndi də süni intellekt modellərinin işləmə xərclərinin azalması eyni effekt yaradır və Afrika, Mərkəzi Asiya və Hindistanda ChatGPT istifadəsi digər regionlardan daha sürətli artır”.
İkinci mühüm trend modellərin az resurslu dillərdə imkanlarının genişlənməsidir. Z.Kass qeyd edib ki, GPT-5 Azərbaycan dili də daxil olmaqla Mərkəzi Asiya dillərində kifayət qədər yaxşı nəticə göstərir: “Bu, modellərin qlobal miqyasda daha asan qəbul edilməsinə imkan yaradır”.
Üçüncü əsas trend isə Yaxın Şərq və Mərkəzi Asiyada çiplər və data mərkəzlərinə böyük həcmdə investisiyaların yönəldilməsidir.
Onun sözlərinə görə, bu sərmayələr bütövlükdə regional iqtisadiyyata ciddi təkan verəcək.
Kass vurğulayıb ki, ilk iki trend daha çox gənclər və istifadəçilər üçün imkanlar yaradırsa, üçüncü trend bütövlükdə iqtisadiyyata yönəlikdir.
