Tarixə damğa vuran sənətkar Leonardo da Vinçinin məşhur “Vitruv kişi” (Vitruvius adamı) rəsminin içində gizlədilmiş həndəsi nisbət nəhayət ki, müəyyənləşdirilib.
Sherg.az xəbər verir ki, Renessans dövrünün sənətkarı Leonardo da Vinçinin 500 il əvvəl çəkdiyi və “mükəmməl nisbətli kişi bədəni”ni təsvir etdiyi düşünülən Vitruvius adamı, sənət, riyaziyyat və anatomiya biliklərini bir araya gətirən ən məşhur rəsmlərdən biri hesab olunur.
Londonda fəaliyyət göstərən diş həkimi Dr. Rory Mac Sveeney isə bu rəsmdə gizli olan həndəsi şifrəni açdığını iddia edib.
Sveeneyin sözlərinə görə, bu rəsmdəki gizli açar da Vinçinin qeydlərində bəhs etdiyi və fiqurun ayaqları arasına yerləşdirilmiş “bərabəryanlı üçbucaq”da gizlənib.
Dr. Sveeney bu üçbucağın təsadüfi bir forma olmadığını və təbiətdə tez-tez təkrarlanan bir dizayn planını əks etdirdiyini bildirib.
O, bu üçbucağın diş həkimliyində çənə funksiyalarını tənzimləyən və “Bonvill üçbucağı” kimi tanınan anatomik quruluşla üst-üstə düşdüyünü vurğulayıb.
Sveeneyin sözlərinə görə, bu üçbucaq vasitəsilə kvadrat və dairə arasındakı nisbət də ortaya çıxır: 1,64. Bu rəqəm isə təbiətdə təkrar olunan və “səmərəli quruluşların” əsasını təşkil edən xüsusi bir nisbət olan 1,6333-ə olduqca yaxındır.
Sveeney bu nisbətin yalnız insan bədənində deyil, həm də güclü kristalların atomik quruluşunda, insan kəlləsinin nisbətlərində və kürələrin ən sıx yerləşdirilməsində də mövcud olduğunu deyib.
“Leonardo bədənimizin kainatdakı eyni riyazi zərifliklə qurulduğunu hiss etmişdi” – deyə o qeyd edib.
Yeni tapıntılara əsasən, Vitruvius adamı yalnız estetik bir şahəsər deyil, həm də dövrünü qabaqlayan elmi bir hipotez kimi qiymətləndirilir. Bu araşdırma "Journal of Mathematics and the Arts" adlı akademik jurnalda dərc olunub.
Məqalənin nəticə hissəsində isə bu fikirlər yer alıb: “Leonardo da Vinçinin fiqurun ayaqları arasındakı bərabəryanlı üçbucağa etdiyi açıq istinad rəsmin necə qurulduğunu göstərir və onun proporsiya seçimlərinin anatomik əsasını ortaya qoyur.”
