Bizim TV-lərdən hər nə desən, gözlənilir. Çıxmadıqları oyun, aşmadıqları əndazə qalmayıb. Lakin hər dəfə də tamaşaçını heyrətə salmağı bacarırlar. Elə bir formada efirdə görünürlər ki, təəssüf, təəccüb, heyrət, sarsıntı, peşmanlıq... hamısı bir-birinə qarışır. Növbəti oyunbazlıq Elgiz Əkbərdən gəlib. ARB telekanalında yayımlanan “Elgizlə İzlə” proqramının aparıcısı Elgiz Əkbərin ad günü studiyada, proqramın yayımı zamanı qeyd edilib. Özü də necə! Tamaşaçılar Elgizin fotosu ilə sifətlərini örtüblər. Elgizin şəklini sifətlərinə güzgü kimi tutublar, desək, daha dəqiq olar. Anladıq; Elgizin proqramı “reytinqlidir”. Ora düşmək hər “igidin” işi deyil. Elgiz yeni fəaliyyətə başlayan tələbə-aparıcı deyil, təcrübə də keçmir, illərdir efirdə göz önündədir. Sevənləri də var. Onu bəyənməyənlər də. Özündən soruşsaq, sevənlərinin daha çox olduğunu deyər. Ölkədə onu tanımayan bəlkə də yoxdur. Yaxşı, belə olduğu halda, öz mübarək üzünü tamaşaçıların sifətinə “kopyalamaq” nəyə lazımdır? Bəlkə “Həpimiz Elgiziz” mesajını vermək istəyiblər ölkəyə. Bu da yeni reklam növüdürsə, heç də ağıllı yöntəm sayılmaz. Şoudursa, yenə ucuz görünür. Bəzi marketlərdə çürümüş meyvələri endirim qiymətinə satırlar. Bu da “endirim şou”ya bənzəyir. TV-lərimizin halı niyə budur, görək psixoloq nə deyir.
Psixoloq Fərqanə Mehmanqızı “Sherg.az"a açıqlamasında qeyd etdi ki, Elgiz Əkbər hörmət etdiyi aparıcıdır. Lakin:
- Mənə də maraqlıdır ki, verilişində niyə belə hərəkətə yol verib? Niyə, nə məqsədlə edib bunu? Bur çox tanınmış aparıcılar reytinqə üstünlük verirlər. Reytinq əldə etməyə çalışırlar və müxtəlif modellərə, üsullara əl atırlar. Həqiqət budur ki, tələb nədirsə təklif də odur. Bir tərəfdən cəmiyyətimizin zövqü korreksiya olunur. Necə ki geyimimiz, damaq dadımız, zövqlərimiz korreksiya olunur, eləcə də TV-lərin strukturu korreksiya olunur. Ya biz onları korreksiya edirik, ya da onlar bizi. Gerçəklik həm də budur ki, TV-lərdə düşünməyə, diqqət cəmləməyə ehtiyac olmayan mövzular daha çox baxılır. Belə məzmunlu proqramlar reytinq qazanır. Cəmiyyət düşünmək istəmir. Diqqətini nəyəsə cəmləmək, hansısa problemin həllinə çalışmaq istəmir, fəaliyyətsizlik daha çox xoş gəlir insanlara. Düşündürməyən, diqqəti cəmləməyən, beyni yormayan əyləncələr, hadisələr cəmiyyətə daha çox lazımdır. TV proqramlara toplaşan tamaşaçılar, tok-şoularda tamaşaçı olmağa can atanlar başqalarının həyat hekayələrini, hətta faciəli həyat hekayələrini rahatlıqla izləyirlər. Statistikaya baxsaq, bəlkə də Elgizin proqramının məhz həmin ad günü buraxılışı daha çox baxılıb, reytinq toplayıb. Nə danışasan?.. Təəssüf hissi ilə qeyd etməliyəm ki, düşündürən, məntiqə söykənən proqramların reytinqi yoxdur. Aparıcılar da belə ucuz göstərilərə, ucuz şoulara əl atır.
