Azərbaycan bir daha İrana üzərinə götürdüyü öhdəliklərə, imzaladığı sənədlərə sadiqliyini nümaiş etdirir
Son dövrlərdə regionda baş verən siyasi proseslər və aparılan diplomatik təmaslar fonunda Azərbaycanla İran arasında münasibətlərin gedişatı yenidən diqqət mərkəzidədir. Xüsusilə iqtisadi əməkdaşlığın və birgə infrastruktur layihələrinin gələcəyi bu kontekstdə mühüm əhəmiyyət daşıyır. Rəsmi səfərlər çərçivəsində aparılan danışıqlar, tərəflər arasında yaranmış bəzi texniki və siyasi anlaşılmazlıqların aradan qaldırılması, eləcə də əməkdaşlığın yeni mərhələyə keçidini təmin etməyə yönəlib.
Bu çərçivədə İran Prezidenti Məsud Pezeşkian, İranda səfərdə olan Baş nazirin müavini, Azərbaycan-İran Hökumətlərarası Komissiyasının sədri Şahin Mustafayevin rəhbərlik etdiyi nümayəndə heyətini qəbul edib. Görüş zamanı Prezident İlham Əliyevin salamları və xoş arzuları İran Prezidentinə çatdırılıb. Tərəflər bildiriblər ki, hər iki ölkə rəhbərliyinin siyasi iradəsi və diqqəti sayəsində Azərbaycan-İran münasibətləri uğurla inkişaf edir. Həmçinin görüşdə möhkəm təməllər üzərində qurulmuş bu əməkdaşlığın daha da genişləndirilməsi və birgə layihələrin ardıcıl şəkildə həyata keçirilməsinin əhəmiyyəti xüsusi vurğulanıb.
Orta Doğu Araşdırmalar Mərkəzinin rəhbəri, siyasi şərhçi Sədrəddin Soltan Sherg.az-a açıqlamasında bu səfərin avqustda Vaşinqtonda Azərbaycan, Ermənistan və ABŞ liderlərinin görüşündən sonra İrana edilən ilk səfər olduğunu qeyd edib:
"Həmin görüşdən sonra İran prezidenti Məsud Pezeşkian İrəvanda səfərdə oldu. Amma Azərbaycan baş nazirinin müavini, Azərbaycan-İran hökumətlərarası komissiyasının sədri Şahin Mustafayevin İrana səfəri ölkələr arasında yarımçıq qalan layihələrin tamamlanmasının və bu istiqamətdə görülən işlərin gedişatı baxımından maraqlıdır. Çünki Arazın üstündən çəkilən körpünün İranın tikmədiyi və yarımçıq qaldığına dair xəbərlər yayıldı. İran bəyan edir ki, bu körpü ilin axırına qədər istifadəyə veriləcək".
Ekspert Azərbaycanla İran arasında münasibətlərin, iqtisadi əlaqələrin inkişafının, normallaşmasının, dərinləşməsinin iki ölkənin münasibətlərinə problem yaradanlara cavab baxımından önəmli sayıla biləcəyini vurğulayıb:
"Bu həm də Azərbaycan prezidenti İlham Əliyevin İranla bağlı siyasətinin davamlılığının göstəricisidir. Azərbaycan bir daha İrana üzərinə götürdüyü öhdəliklərə, imzaladığı sənədlərə sadiqliyini və bunların davamlı olduğunu nümaiş etdirir".
