Türk Dövlətləri Təşkilatına üzv ölkələrin məhkəmə şuralarının 3-cü iclası və Azərbaycan Respublikası Məhkəmə-Hüquq Şurasının fəaliyyətinin 20 illiyinə həsr olunmuş “Məhkəmə idarəçiliyi sahəsində qlobal çağırışlar” adlı beynəlxalq konfransda əsasnamə imzalanıb.
Hüquq Şurasının və Ali Məhkəməsinin sədri İnam Kərimov, Türk Dövlətləri Təşkilatının Baş katibi Kubanıçbek Ömüralıyev, Qırğız Respublikasının Hakimlər Şurasının sədri Aida Seidakmatova, Türkiyə Cümhuriyyətinin Hakimlər və Prokurorlar Şurasının sədri vəzifələrini icra edən Fuzuli Aydoğdu, Özbəkistan Respublikasının Ali Məhkəmə Şurasının sədri Kholmumin Yodgorov, Qazaxıstan Respublikasının Ali Məhkəmə Şurasının üzvü Yernar Begaliyev, Şimali Kipr Türk Cümhuriyyətinin Ali Məhkəməsinin sədri Bertan Özerdağ əsasnaməni imzalayıb.
Milli Məclisin deputatı Ceyhun Məmmədov Sherg.az-a söyləyib ki, son illər ölkəmizin bu cür beynəlxalq konfranslara ev sahibliyi etməsi olduqca vacib və önəmli bir məsələdir:
"Azərbaycan artıq ardıcıl və sistemli şəkildə bu kimi beynəlxalq tədbirlərdə yer alır. Bu gün biz görürük ki, TDT sürətli bir formada Türk dövlətləri arasında əlaqələrin inkişafına töhfə verir. Bu isə olduqca vacib və önəmli məsələdir. Türk dövlətləri arasında münasibətlərin güclənməsi inteqrasiya və əməkdaşlığın dərinləşməsi üçün xüsusi əhəmiyyət daşıyır. Eyni zamanda bu tədbir məhkəmə idarəçiliyi sahəsində çağırışların müzakirəsi baxımından da önəmlidir. Türk Dövlətləri Təşkilatının nəzdində fəaliyyət göstərən Məhkəmə-Hüquq Şurasının fəaliyyəti xüsusi əhəmiyyət kəsb edir. Artıq bu qurumun 20 illiyi qeyd olunur ki, bu da önəmli hadisələrdən biridir".
Deputatın əlavə edib ki, konfrans çərçivəsində imzalanan sənəd Türk dövlətlərinin məhkəmə orqanları arasında əməkdaşlığın güclənməsi, möhkəmlənməsi və inkişafı baxımından böyük əhəmiyyət daşıyır:
"Bu sənəd, həmçinin üzv dövlətlərin məhkəmə strukturları arasında qarşılıqlı təcrübə və məlumat mübadiləsinin aparılmasına müsbət təsir göstərəcək. Sözügedən tədbir – keçirilən görüş və konfrans mühüm və əhəmiyyətli hesab olunur".
