ABŞ-lı alimlərin apardığı yeni bir araşdırmaya görə, kartofu qızardılmış halda yemək tip 2 diabet riskini artırır. Bişmiş (haşlanmış) kartofda isə belə bir təsir müşahidə olunmayıb.
Sherg.az xəbər verir ki, “British Medical Journal” jurnalında dərc olunan araşdırmada, 40 il ərzində təxminən 200 min ABŞ-lı tibb işçisinin qidalanma vərdişləri izlənib. Bu müddət ərzində 22 min nəfərə tip 2 diabet diaqnozu qoyulub.
“Mirror” qəzetinin məlumatına görə, sobada bişmiş və ya haşlanmış kartofun çox miqdarda yeyilməsi diabet riskini artırmır, amma qızardılmış kartof istehlakı risklə birbaşa əlaqələndirilir. Həftədə ən az üç porsiya qızardılmış kartof yeyənlərdə tip 2 diabet riski 20%, bu miqdarı həftədə beş porsiyaya çıxaranlarda isə risk 27% artır.
Araşdırmada iştirak edən mütəxəssislər bu fərqin əsas səbəbini bişirmə üsulu ilə izah edirlər. Qızardılmış kartof əvvəlcə nazik zolaqlar şəklində kəsilir, sonra yağda qızardılır. Adətən daha xırtıldayan olması üçün öncədən yağda haşlanır və bəzi qatqı maddələri ilə rəngi qorunur. Bu proseslər kartofu “ultra emal olunmuş” qidaya çevirir.
Araşdırma həmçinin göstərib ki, həftədə üç porsiya kartofu tam taxıllarla (qəhvəyi düyü, tam buğda çörəyi, yulaf, arpa, kinoa, qarabaşaq) əvəzləmək diabet riskini 8% azalda bilər.
