Qazaxıstanın BRİKS-ə tamhüquqlu üzv olması barədə danışmaq tezdir.
APA xəbər verir ki, bu barədə Qazaxıstan XİN rəsmi nümayəndəsi Aybek Smadiyarov bildirib.
Smadiyarovun sözlərinə görə, rəsmi Astana BRİKS-ə üzv olan ölkələrlə əməkdaşlıqda maraqlıdır: “Qazaxıstan BRİKS ölkələri (Braziliya, Rusiya, Hindistan, Çin, Cənubi Afrika) ilə əməkdaşlıqda maraqlıdır, lakin ölkəyə bu təşkilatın tamhüquqlu üzv statusu verilməsindən danışmaq hələ tezdir”.
Smadiyarov onu da əlavə edib ki, təşkilatın iki üzvü - Rusiya və Çin Qazaxıstanın qonşuları və ən yaxın siyasi, ticarət-iqtisadi tərəfdaşlarıdır. Qazaxıstanla Hindistan arasında strateji tərəfdaşlıq əlaqələri qurulub.
XİN rəsmisinin sözlərinə görə, yeni ticarət yollarının qurulması və Qazaxıstan iqtisadiyyatının şaxələndirilməsi məqsədilə Cənubi Afrika Respublikası (CAR) və Braziliya ilə qarşılıqlı faydalı dialoq qurulur: “Qazaxıstanın BRİKS-ə mümkün üzvlüyünə gəlincə, qeyd etmək lazımdır ki, indiyədək bu təşkilatın genişləndirilməsi üçün meyarlar və mexanizm hazırlanmayıb”.
Xatırladaq ki, bir müddət öncə CAR Xarici İşlər və Əməkdaşlıq naziri Naledi Pandor 23 ölkənin, o cümlədən Qazaxıstanın BRİKS-ə üzv olmaq üçün rəsmi müraciət etdiyini bildirmişdi.
Təşkilatın genişləndirilməsi və yeni ölkələrin qəbul olunması məsələsi Cənubi Afrika Respublikasının sədrliyi ilə 22-24 avqust tarixlərində Yohannesburqda keçiriləcək BRİKS-in sammitində müzakirə olunacaq.
