Əlcəzair Fransanı 1960-1966-cı illərdə ölkədə törədilən "nüvə cinayətləri"nə görə məsuliyyəti tam üzərinə götürməyə çağırıb.
Teleqraf xəbər verir ki, bu barədə Əlcəzair Milli Xalq Assambleyasının sədri İbrahim Buqali Fransanın Əlcəzairdə ilk nüvə sınağını keçirməsinin (13 fevral 1960-cı il) ildönümü münasibətilə reallaşan anım toplantısında bildirib.
Buqali deyib: “Biz yekdilliklə Fransadan "nüvə cinayətləri"nə görə məsuliyyəti rəsmi şəkildə tam üzərinə götürməyi tələb edirik. Bu etiraf sadəcə, qeyri-müəyyən siyasi etiraflardan ibarət olmamalıdır, onun ardınca açıq-aşkar mənəvi öhdəlik olmalıdır. Fransa bölgədə 17 nüvə partlayışı həyata keçirdi. Onların dağıdıcı təsirlərinin bu gün də hiss olunur. Bu, mənfur müstəmləkəçilik tarixinin qaranlıq səhifələridir".
Fransanın qurbanlara təzminat ödəməsi və nüvə tullantılarının təmizlənməsi çağırışını təkrarlayan Buqali, ölkəsinin müstəqillik əldə etmək, azadlığını və suverenliyini qurmaq üçün ağır bədəl ödədiyini, heç kəsi məsuliyyətə cəlb etmədən, bu cinayəti etiraf etmədən bu səhifənin bağlanmasının heç vaxt qəbul olunmayacağını vurğulayıb.
Buqali deyib ki, Fransa nüvə bombası qurbanları və onların ailələri ilə ədalətli davranmalı, onların yaşadıqları faciə ilə mütənasib olmalı və Əlcəzair xalqının qanuni ədalət haqqını təmin etməlidir.
