“Hər kəs bilməlidir ki, istila cəhdləri ilə yaşayan dövlətlərin aqibəti necə olur”
Azərbaycan Xarici İşlər Nazirliyinin Mətbuat xidməti idarəsinin rəisi Leyla Abdullayeva Fransanın Ermənistandakı səfirinin Azərbaycanda Hərbi Qənimətlər Parkının açılışı ilə bağlı şərhinə münasibəti bildirib. O, bildirib ki, Fransanın Ermənistandakı səfirinin hər hansı bir məsələ ilə bağlı şərh bildirmədən öncə öz ölkəsinə nəzər salması, bu və ya digər məsələlərin onun ölkəsində nə şəkildə həyata keçirildiyinə diqqət yetirməsi yaxşı olardı. Tarix boyu çoxsaylı müharibələrdən keçən və bu müharibələrlə bağlı kompozisiyaları, səfirin dili ilə desək “tamaşaları” müxtəlif muzeylərdə sərgiləyən Fransa səfiri bizə düşməndən götürülən qənimətlərlə necə davranacağımızımı deyəcək.
“Fransa səfirlərinin Ermənistanın məğlubiyyətini “ləyaqətli məğlubiyyət” adlandırması da maraq doğurur. Bəlkə, Fransa səfirinə görə Ermənistanın 30 ilə yaxın davam edən təcavüzkar siyasəti də “ləyaqətli işğal” olub? Ləyaqətli davranan ölkə, birinci növbədə qonşu ölkənin ərazilərinə iddia ilə çıxış edib, bu ərazilərin bir hissəsini uzun illər işğal altında saxlamaz, bir milyon insanın hüququnu kobudcasına pozmaz, mülki şəxslər də daxil olmaqla, insanları məqsədli şəkildə qətlə yetirməz. Ləyaqətli ölkə, hərbi əməliyyatların dayandırılmasına razılıq verdikdən sonra digər ölkə ərazilərinə terrorçu qrupu göndərməz və mina xəritələrini gizlətməklə insan həyatına təhlükə törətməz. Görünür, Fransa səfirinin ləyaqət anlayışı fərqlidir. Uzun illərdir ki, vasitəçi rolunda çıxış edən bir ölkənin rəsmi nümayəndəsinin verdiyi şərhlərə daha məsuliyyətlə yanaşması gərəkdir”, - deyə Leyla Abdullayeva qeyd edib.
Bu barədə “Sherg.az”a danışan politoloq Tofiq Abbasovun fikrincə isə səfirin bəyanatı yersizdir:
“İndi Hərbi Qənimətlər Parkının çox mühüm əhəmiyyəti var. Çünki tarix ən çox saxtalaşdırılan sahədir. Və bəzi hallarda təhrif olunmuş faktlar insanları, xüsusilə gəncləri çaşdırır. Bu park dünyaya ibrət dərsi olmalıdır.
Hər kəs bilməlidir ki, istila cəhdləri ilə yaşayan dövlətlərin aqibəti necə olur. Bu park sülh yox, müharibə həvəsi ilə yaşayan xalqların məntiqi sonudur. İkinci bir tərəfdən isə yetişməkdə olan nəsil bizim ermənilər kimi qonşularımız olduğunu unutmamalıdır.
Həmin səfir əvvəlcə özlərinin törətdikləri humanitar faciələri xatırlasın. Belələrinin bütün səyləri regiondakı vəziyyəti daha da mürəkkəbləşdirməkdən ibarətdir.
Halbuki diplomatların işi bunun tam əksi olaraq sabitliyi bərpa etməkdir”.
