Ötən gün Fransanın təşəbbüsü ilə BMT Təhlükəsizlik Şurasının iclası keçirilib. Toplantı heç bir sənəd qəbul olunmadan başa çatıb.
İclasda Fransa, Almaniya və Aİ-nin BMT TŞ-da Azərbaycana qarşı çıxışlar ediblər.
Xüsusi ilə Avropa İttifaqının (Aİ) xarici işlər və təhlükəsizlik siyasəti üzrə ali nümayəndəsi Cozep Borelin sentyabrın 21-də regionda baş verən son hadisələrlə bağlı bəyanatı yerlərdəki bütün reallıqları qəsdən təhrif edib. Borrelin dünən danışdığını Aİ ayrıca bəyanat kimi yaymaq istəsə də, Macarıstanın etirazına görə baş tutmayıb.
Görünür, Aİ prosesə – xristian təəssübkeşliyi, səlibçi psixologiyası ilə yanaşır. Çünki Ermənistanın baş nazirinin özü Qarabağda ermənilərin həyatına təhlÜkə olmadığını bəyan etdiyi halda, Aİ və ayrı-ayrılıqda burada baş rolda olan ölkələr əsassız ittihamlar və iftiralar səsləndirirlər. Bu isə ikili standartların bariz nümunəsidir.
Aİ-nın və bəzi Avropa ölkələrinin BMT-dəki çıxışını "Sherg.az" dəyərləndirən millət vəkili Asim Mollazadə vurğulayıb ki, Azərbaycana qarşı irəli sürülən "ittiham"lar Fransanın təzyiqi altında həyata keçirilib:
"Hadisə bilavasitə erməni diasporu ilə əlaqədardır. Erməni lobbisi Azərbaycan-Ermənistan arasında sülh müqaviləsinin imzalanmasını və Qarabağda yaşayan erməni icmasının reinteqrasiyasını istəmir. Onların arzuları faciələr yaratmaq, "erməni genosidi" adı ilə dünyaya yalandan car çəkməkdir. Rəsmi Parisin bütün ifadələri də bilavasitə erməni lobbisinin istəkləri ilə bağlıdır".
A.Mollazədənin sözlərinə Fransa bölgəyə müdaxilə etmək istəyir:
"Çünki onlar Afrikadakı mövqeylərini itiriblər. Yeni kolonial siyasət yürütmək üçün isə Rusiyanın zəifləməsindən istifadə edərək Cənubi Qafqazda Moskvanı əvəzləməyə çalışırlar. Fikrimcə, onlar uğursuzluğa düçar olacaq. Azərbaycan beynəlxalq hüquq normaları çərçivəsində münaqişənin həllinə nail olub. Hətta Ermənistanın Baş naziri belə qeyd edib ki, Qarabağdakı erməni icmasına heç bir təhlükə yoxdur".
