“Ermənistanla münasibətlərin normallaşdırılması prosesi Azərbaycanda hər hansı bir narahatlığa səbəb olmur, əksinə Azərbaycan bu prosesi dəstəkləyir”.
Bu sözləri Türkiyənin Xarici İşlər naziri Mövlud Çavuşoğlu “TRT Haber” kanalında Türkiyə-Ermənistan münasibətlərinin normallaşdırılması prosesinin Azərbaycanda hər hansı bir narahatlıq yaradıb yaratmamasına dair sualı cavablandırarkən deyib.
“Onsuz da Azərbaycanla koordinasiya, müzakirə etmədən biz hər hansı bir addım atmırıq, atmarıq. Azərbaycan da bizim vasitəçilər yolu ilə deyil, birbaşa təmas qurmağımızı üstün sayır.
Bəzi məsələləri birbaşa danışmalıyıq. Çünki nə barədə danışırıq? Cənubi Qafqazda bu problem Azərbaycanın Qarabağ zəfəri ilə sonlandırıldı. Bundan sonra sülh olmalıdır, əməkdaşlıq olmalıdır. Regionda əhəmiyyətli layihələr icra edərək, buranın iqtisadi tərəqqisi üçün çalışmaq gərəkdir. Buna görə də bütün ölkələrin eyni anlayış içində olması vacibdir. Hər kəsin bu prosesin içində olması, kimsənin kənarda qalmaması lazımdır. Buna Ermənistan da daxildir.
Qarabağ zəfərindən çıxan bir dərs və bir də fürsət var. Bu fürsətdən yaxşı istifadə etmək lazımdır. Biz zəfərdən dərhal sonra müsbət mesajlar verdik. Ermənistan buradan dərs alarsa region üçün, regionun inkişafı üçün addımlar atarıq, münasibətlərimizi normallaşdırarıq, dedik.
Paşinyan seçkidə qalib gəldikdən sonra önəmli mesajlar verdi. Prezidentimiz buna müsbət qarşılıq verdi. Sonra bizim təmaslarımız oldu, xüsusi nümayəndələr təyin etdik. Onlar Moskvada görüşdülər. İndi isə fevralın 24-də Vyanada görüşəcəklər.
Mən istərdim ki, artıq ilk toplantıdan sonra Türkiyə və Ermənistanda vasitəçisiz qarşılıqlı görüşlər təşkil olunsun, ancaq Ermənistan bu dəfə də belə istədi, problem deyil.
Bu addımları atarkən, əlbəttə ki, Azərbaycanla müzakirə aparır, addımları koordinasiya edirik. 3+3 platforması toplantısından əvvəl də bunu edirik. Moskvada təklif etdiyimiz sənədi də birlikdə hazırladıq, bərabər çalışırıq.
Çünki Azərbaycan da bunu istəyir. Azərbaycan da artıq Ermənistanla davamlı sülh istəyir. Buna görə də hərtərəfli bir sülh sazişinin imzalanmasını təklif etdi. Bu hər birimizin xeyrinədir.
Zəngəzur dəhlizi də daxil olmaqla quru və dəmiryolu layihələrinin həyata keçməsi bölgəni əsl haba çevirəcək. Tranzit keçidlərin mərkəzi halına çevirəcək. Bundan hər kəs qazanacaq.
Atışma ilə, işğalla Ermənistan nə əldə etdi? Özünü təcrid etdi, iqtisadiyyatı çox pis vəziyyətə düşdü. İndi fürsət var, bu fürsətdən istifadə etmək lazımdır”, - deyə M.Çavuşoğlu bildirib.
Onun sözlərinə görə, ABŞ və Fransadakı erməni diasporu və daxildəki bir sıra qüvvələr prosesi dəstəkləmir və bununla bağlı N.Paşinyana təzyiq edirlər.
