Türkiyənin Gümüşhane və Yozqat bölgəsində kənə dişləməsi nəticəsində yoluxan Krım-Konqo Qanamalı Qızdırması (KKQK) xəstəliyi şübhəsi ilə xəstəxanaya yerləşdirilən iki nəfər həyatını itirib.
Sherg.az xəbər verir ki, Gümüşhanənin Şiran rayonunda sürüsünə çobanlıq edən 39 yaşlı Alaattin Uzuntürk bir həftə əvvəl gənə tərəfindən dişlənib. Bir müddət sonra özünü pis hiss edən Uzuntürk ailə üzvləri tərəfindən Kürtün dövlət xəstəxanasına aparılıb. Vəziyyəti ağırlaşdığından Qara dəniz Texniki Universitetinin (KTÜ) Tibb Fakültəsi Farabi xəstəxanasına təxliyə olunub. KKQK xəstəliyi şübhəsi ilə reanimasiyaya yerləşdirilən Uzuntürk həkimlərin müdaxiləsinə baxmayaraq həyatını itirib.
Yozqatda da gənə can aldı
Yozqatın Sarıkaya rayonunun Alembey kəndində yaşayan 66 yaşlı Celal Sarsılmaz da təxminən bir həftə əvvəl gənə dişləməsinə məruz qalıb. Bir müddət sonra səhhətində problem yaranan Sarsılmaz yaxınları tərəfindən Yozqatdakı xəstəxanaya aparılıb. Vəziyyəti pisləşdiyinə görə o, Sivas Cumhuriyyət Universiteti Sağlıq Xidmətləri Tətbiq və Tədqiqat xəstəxanasına köçürülüb. KKQK şübhəsi ilə anesteziya reanimasiya şöbəsində müalicəyə cəlb edilən Sarsılmaz göstərilən tibbi yardıma baxmayaraq həyatını itirib.
