Gürcüstanın ali məktəblərinə qəbul olmaq üçün 9 iyul tarixində ümumi qabiliyyət imtahanı verən azərbaycandilli abituriyentlərin bir qismi 80 sualdan ibarət testin iki sualında müxtəlif xətalar oluduğunu iddia edirlər.
24News.ge xəbər verir ki, onlar 21 və 69 nömrəli testlərdə problemin olduğuna diqqət çəkirlər.
Milli İmtahanlar Mərkəzi imtahanda istifadə edilən testləri yayımladıqdan sonra, çox sayda abituriyent qeyd edilən iki testlə bağlı mərkəzin "Facebook" səhifəsinə şikayet mesajları ünvanlayıb.
Onların iddiasına görə, 21 nömrəli testdə abituriyentlərin bir qismi "Maka" adının qadın, yoxsa kişiyə məxsus olduğunu anlamadığı üçün, testin düzgün cavabını tapmaqda çətinlik çəkib.
Abituriyentlərin bir qismi isə iddia edir ki, 69 nömrəli testin əsas şərtində xəta olub ki, bu da onlara düzgün cavabı tapmaq imkanı verməyib.
Qiymətləndirmə və Milli İmtahanlar Mərkəzi azərbaycandilli abituriyentlərin iradları ilə bağlı hələlik hər hansı bir açıqlama verməyib.
Qeyd edək ki, Ümumi Qabiliyyət İmtahanlarının nəticələrinin avqust ayının əvvəlində açıqlanacağı gözlənilir.
