Peşə təhsili məşğulluğun təmin edilməsinə dəstək olmalıdır
Millət vəkili Vüqar Bayramov “Peşə Təhsili” haqqında qanun layihəsinə təklif edilən dəyişikliklərlə bağlı çıxış edib. Deputat bildirib ki, dəyişikliklərdə məqsəd peşə təhsilini təşviq etmək olsa da, bir sıra standartların konkretləşdirilməsi vacibdir: “Peşə təhsili ilə əmək bazarı arasında əlaqənin formalaşdırılması və gücləndirilməsinə ehtiyac var.
Etiraf edək ki, hazırda peşə təlimi ilə əmək bazarı arasında münasibətlər zəifdir. Bu baxımdan, dəyişikliklər peşə təlimi ilə əmək bazarı arasındakı əlaqənin gücləndirilməsini təşviq etməlidir. Peşə təhsili daha çox orta məktəbdə zəif göstəriciləri olan şagirdlərin təhsilin digər pilləsinə qəbul imkanı deyil, onların əmək bazarında işlə təminatının gücləndirilməsinə xidmət etməlidir”.
Parlament üzvü bəyan edib ki, kreditlərin əvəzlənməsi mexanizmi də təkmil tətbiq olunmalıdır: “Məsələn, peşə təhsilində mühasib uçotu üzrə kredit alan vətəndaş ali məktəbdə həmin krediti götürən zaman onun əvəzlənməsinə nail olmalıdır. Bütövlükdə, peşə təhsilinin əsas fəlsəfəsi təhsilin fərqli pillələri arasında əlaqə formalaşdırmaq hesab olunmamalıdır. Peşə təhsili əmək bazarı üçün daha qısa müddətdə kadrlar hazırlayıb məşğulluğun təmin edilməsinə dəstək olmalıdır”.
