İmtahan suallarında müxtəlif pedaqoji situasiyalara uyğun yanaşma tələb edən tapşırıqların yer alması məqsədəuyğundur
“Müəllimlərin İşə Qəbulu (MİQ) üzrə imtahanda namizədlər fənn, pedaqogika və fənnin tədrisi metodikası üzrə suallar əsasında qiymətləndirilirlər”.
Bunu bu gün 161 nömrəli məktəbdə müəllimlərin işə qəbulu (MİQ) imtahanı ilə bağlı açıqlamasında Məktəbəqədər və Ümumi Təhsil üzrə Dövlət Agentliyinin direktor müavini Vəfa Yaqublu bildirib.
O bildirib ki, metodikaya dair tətbiqi sualların cavablandırılması nəzəri metodiki biliklərlə yanaşı pedaqoji təcrübə də tələb edir. Situasiyanı aydın dərk edənlər, pedaqoji duyumu olanlar belə sualları cavablandırmaqda çətinlik çəkmirlər.
Direktor müavini müəllimlərə və namizədlərə çağırış edərək metodiki biliklərin həm nəzəri, həm də praktiki tərəfinə daha çox diqqət ayrılmasının vacibliyini vurğulayıb. Onun sözlərinə görə, bu istiqamətdə bilik və bacarıqların artırılması həm müəllimlərin peşəkarlığını yüksəldəcək, həm də təlim prosesini şagirdlər üçün maraqlı və səmərəli edəcəkdir.
Təhsil eksperti Elçin Süleymanov “Sherg.az”a bildirib ki, heç bir imtahan sistemi mükəmməl deyil və bu səbəbdən onun davamlı şəkildə təkmilləşdirilməsinə ehtiyac var:
“İmtahanda iştirak edən namizədlərin müəyyən bir hissəsinin prosesdən narazı qalması təbii haldır və bu vəziyyət hər zaman müşahidə olunur. İmtahan materiallarının hazırlanması və qiymətləndirmə meyarları formalaşdırılarkən, ümumi olaraq orta səviyyəli bir pedaqoqun bilik və bacarıqları əsas götürülməlidir. Bu baxımdan, sualların çətinlik dərəcəsi balanslı şəkildə müəyyən edilməlidir nə həddindən artıq çətin, nə də çox asan olmalıdır. Çünki imtahanın əsas məqsədi pedaqoji kadrların bilik və bacarıqlarını obyektiv şəkildə ölçməkdir. Bununla yanaşı, imtahan suallarında müxtəlif pedaqoji situasiyalara uyğun yanaşma tələb edən tapşırıqların yer alması məqsədəuyğundur. Belə ki, yalnız nəzəri biliklərin deyil, həmin biliklərin praktiki müstəvidə tətbiqi bacarığının da qiymətləndirilməsi mühüm əhəmiyyət kəsb edir. Beynəlxalq dil imtahanlarında yalnız qrammatika deyil, eyni zamanda danışıq, dinləmə və anlama bacarıqları da yoxlanılır. Bu yanaşmanın metodik baxımdan Müəllimlərin İşə Qəbulu (MİQ) imtahanlarında tətbiqi də səmərəli ola bilər. Burada əsas şərt cavabların konkret və ölçülə bilən olmasıdır ki, bu da subyektiv qiymətləndirmə riskini minimuma endirir.
Eyni zamanda, təcrübənin simulyasiyası, nəzəri biliklərin praktikaya inteqrasiyası, mövcud təhsilalan kontingentinin xüsusiyyətləri və texnoloji imkanlardan istifadə bacarıqları da nəzərə alınaraq tərtib olunmuş situasiya tipli suallar, müəllimlərin yalnız fənn biliyini deyil, pedaqoji kompetensiyalarını da etibarlı şəkildə qiymətləndirməyə imkan verir”.
