“Tehranın Azərbaycanla- Ermənistan arasında sərhədlərin müəyyənləşdirilməsinə dair narahatlığı göz qabağındadır”
“Səfirin sərhədə səfəri isə, ümumiyyətlə, anormal addımdır”
“Tehran hərəkətlərini redaktə etməsə, biz münasibətimizi dəyişməli olacağıq”
İranın Ermənistandakı səfiri Abbas Zohuri Ermənistan-Azərbaycan sərhədinə səfər edib. Erməni hərbçilərinin müşayiəti ilə sərhəd bölgələrinə baş çəkən səfir əsasən gərginlik yaşanan məntəqələrdə olub. İran səfiri sərhəddəki gərginliyə görə narahatlıq keçirdiklərini bildirib və son hərbi qarşıdurmalarda həlak olan erməni hərbçilərinin ailələrinə başsağlığı verib. Erməni hərbi hissəsinin komandiri sərhəddəki vəziyyətlə bağlı səfirə ətraflı məlumat verib.
İran səfirinin ermənilərin səngərində dayanıb Azərbaycan ərazilərinə durbinlə baxması dost hesab olunacaq bir ölkənin diplomatının davranışı ilə uyğun deyil. İctimaiyyətin yadındadır ki, Qafqaz Müsəlmanları İdarəsinin sədri Allahşükür Paşazadənin “Ayətullah Xamenei həzrətlərinə müsəlmanlar adından təşəkkürümü bildirirəm. Ayətullah Xameneinin – “Qarabağ torpağı İslam torpağıdır”, – deyərək fətva verməsi qələbənin carçısı idi və bizi qələbəyə apardı” fikirləri haqlı etirazla qarşılanmışdı. Çünki Azərbaycan xalqı 44 günlük müharibədə İranın necə mövqe nümayiş etdirdiyini dəqiq bilirdi.
Milli Dirçəliş Hərəkatı Partiyasının sədri Fərəc Quliyev bu barədə “Sherg.az”a açıqlamasında cənub qonşumuzun addımlarını qınadı:
“Biz həmişə İranla təktərəfli qonşuluq siyasəti yeritməyə çalışmışıq. Bakı Tehrana qarşı təzyiqlərdə iştirak etməyib. Amma İranın addımları daim qeyri-adekvat olub.
Müharibə vaxtı hətta xristian dövlət olmasına rəğmən, Gürcüstan Ermənistanla yolu bağladı. İran vasitəsi ilə isə 900 tonadək silah-sursat daşındı. Həmin avtomobillərin görüntüləri də sosial şəbəkələrdə yayılmışdı”.
F.Quliyev düşünür ki, bu, bizim də qonşu ölkəyə siyasətimizin dəyişməsinə səbəb ola bilər:
“İran müsəlman ölkəsi olmasına baxmayaraq, bir dəfə də olsun erməni silahlılarının Qarabağdan çıxarılması barədə bəyanat verməyib. Tehranın Azərbaycanla- Ermənistan arasında sərhədlərin müəyyənləşdirilməsinə dair narahatlığı göz qabağındadır.
Səfirin sərhədə səfəri isə, ümumiyyətlə, anormal addımdır. İranın Azərbaycanda da səfiri var. O, bizim müşayətimizlə istədiyi yerə gedə bilərdi. Fikrimcə, Tehran hərəkətlərini redaktə etməsə, biz münasibətimizi dəyişməli olacağıq”.
