"Almaniya dünya diplomatiyasında böyük rol oynamağa başlayıb. Bu dövlət Yaxın Şərqdə, Cənubi Qafqazda, Avropada öz siyasi xəttini yeridir”.
Bunu "Sherg.az”a Rusiya prezidenti Vladimir Putin və Almaniya kansleri Angela Merkel arasında keçirilən görüşün əhəmiyyətindən danışarkən "Tolerantlıq” Sosial Araşdırmalar İctimai Birliyinin sədri Azər Rəşidoğlu söyləyib.
O bildirib ki, Almaniya Avropanın lider dövlətinə çevrilməkdə olduğundan bu prosesdə ona müttəfiqlər lazımdır:
"Donald Trampın ABŞ prezidenti seçildikdən sonra yürütdüyü siyasət bir çox Avropa ölkələrini narazı salır. Almaniya da Türkiyə və Rusiya ilə münasibətlərinin korlanmasını istəmir. Bu xüsusilə, Almaniyanın Avropanın əsas güc mərkəzinə çevrilməsi üçün lazımdır. Rəsmi Berlin Rusiya ilə münasibətlərin korlanmasının vaxt, maliyyə, enerji itkisi olduğunu dərk edir. Angela Merkel Rusiya ilə yaxınlaşmaq və münasibətləri qaydasına salmaqda maraqlıdır. Uzun müddət davam etməsə də, aralıq müddətdə Rusiya və Almaniya arasında əməkdaşlıq mümkündür. Bu yaxınlaşmanın zorən müttəfiqlik kimi dəyərləndirməyin tərəfdarıyam”.
Qeyd edək ki, Rusiya prezidenti Vladimir Putin ilə Almaniya kansleri Angela Merkel arasında Mezeberq qəsrində keçirilən görüş üç saat davam edib. Görüşdən əvvəl mətbuata bəyanatlarla çıxış edən A.Merkel və V.Putin qeyd ediblər ki, işçi nahar formatında keçiriləcək görüşdə ikitərəfli və regional məsələlərlə bağlı fikir mübadiləsi aparacaqlar. Həmçinin bildirilib ki, söhbət zamanı Suriya məsələsi, Ukrayna böhranının həlli yolları, "Şimal axını-2” layihəsi, İranın nüvə proqramı üzrə saziş ətrafındakı vəziyyət müzakirə olunacaq.
Aysel Aslan
