ABŞ prezidenti Donald Trampın Qolan təpələri üzərində İsrailin suverenliyini ABŞ-ın rəsmi olaraq tanıdığını elan edən qərarından sonra dünya bu qərara çox sərt reaksiyalar verib.
"Sherg.az” bildiri ki, Fələstin lideri Mahmud Abbas deyib ki, Qüds üzərində və ya hər hansı bir ərəb torpağının suverenliyinə toxunan hansısa qərar qanuni deyil.
Böyük Britaniyanın Xarici İşlər Nazirliyi Qolan təpələrini İsrailin işğal etdiyi ərazilər hesab etdiyini və İsrailin ilhaqını tanımağı planlaşdırmadığını açıqlayıb.
Nazirlikdən edilən yazılı şərhdə, "Qolan təpələrini İsrail işğalı altındakı torpaq olaraq görürük. İsrailin 1981-ci ildəki ilhaqını dəstəkləmirik. Torpaqların işğal edilməsi beynəlxalq hüquq çərçivəsində, o cümlədən Birləşmiş Millətlər Təşkilatının Konvensiyası ilə qadağan edilir" - deyilir.
Rusiya Xarici İşlər Nazirliyinin sözçüsü Mariya Zaxarova Trampın qərarını tənqid edərək deyib ki, bu qərar beynəlxalq hüquqa zidddir:
"Bu qərar Yaxın Şərqdəki gərginliyi artıra bilər. Birləşmiş Millətlər Təşkilatının Təhlükəsizlik Şurası qərarlarını heçə sayan bu cür addımlar vəziyyəti daha da pisləşdirir”. Zaxarova qeyd edib ki, əvvəllər bu qərarla bağlı Rusiyadan bir sıra bəyanatlar verilib.
Avropa Birliyi tərəfindən də Qolan təpələri ilə bağlı qərara etiraz edilib:
"İsrailin 1967-ci ildən bəri işğalında olan torpaqlardır ki, biz İsrailin bu ərazilərdə suverenliyini tanımırıq. Bu torpaqları İsrailin bir parçası olaraq görmürük. Bizim mövqeyimiz dəyişməyib”.
Həmas lideri İsmayıl Həniyyə Qolan təpələrinin Suriya torpaqlarının bölünməz bir parçası olaraq qalmağa davam edəcəyini qeyd edib.
Anar
