"Hər keçən gün Ermənistanda vəziyyət daha da pisləşir”
Bu sözləri "Sherg.az”a Ermənistanın regional təcridinin dərinləşməsindən danışarkən politoloq, professor Fikrət Sadıqov söyləyib.
Onun qənaətincə,Azərbaycan Türkiyə və Azərbaycan Gürcüstan münasibətlərinin bu səviyyəyə çatması ölkəmizin diplomatik uğurlarıdır:
"Çünki biz bu alliansların yaranmasına təşəbbüs göstərmişik, müxtəklif görüşlər keçirmişik. Hazırda da ərazi bütövlüyümüz naminə bir sıra işlər görülür. Xarici dövlətlərin Azərbaycana diqqətini cəlb edirik. Daim ölkədə irimiqyaslı layihələr həyata keçirilir. Xarici dövlətlər ölkəmizin ərazi bütövlüyünü tanıyır və bu mövqedən imtina etmək fikrində də deyillər. Ermənistanda yaranan vəziyyət göz qabağındadır. Faktiki olaraq separatçı ölkənin Azərbaycan və Türkiyə ilə əlaqələri yoxdur.
Demək olar ki, Ermənistanın iqtisadi durumu dalana dirənib. Onların xarici və daxili siyasətlərində heç bir müsbət hal müşahidə olunmur. İşğalçı ölkədə daxili siyasət isə qarşıdurma şəklində parlament seçkilərinə getməklərindən ibarətdir. Ermənistan daxilindəki siyasi partiyalar, muxtar qruplaşmalar ölkədə çaxnaşma yaradacaq. Nikol Paşinyan parlamentdə tamaşa qurub, oyunlar oynayır. İstər xarici, istərsə də daxili siyasətdə onun heç bir uğuru yoxdur.
Əlbəttə, bunların hamısı bir sıra dövlətlərin reaksiyasına səbəb olur. Həmin dövlətlərdən biri də Rusiyadır. Nikol Paşinyanın Qərblə Rusiya arasında oynaması şimal qonşumuzu qıcıqlandırır. Təbii ki, Qərb ölkələri və ABŞ onlara silah almağı təklif edir. Lakin silah almaq asan məsələ deyil. İşğalçı ölkənin maddi vəziyyəti çox gərgindir. Ermənilərin pulu yoxdur. Onlar sadəcə dilənirlər. Bu kimi proseslər Ermənistanı təcrid vəziyyətinə salıb. Hər halda işğalçı ölkə regionda təcrid durumdadır. Hətta Ermənistanın bir sıra sağlam düşüncəli insanları da bunu təsdiq edir. Düşünürəm ki, separatçı ölkənin vəziyyəti daha da pisləşəcək. Azərbaycanın hazırkı inkişafı göz qabağındadır. Siyasi addımlarımız və iqtisadi uğurlarımızla Ermənistana təzyiq göstəririk”.
Qeyd edək ki, 30 oktyabr tarixində İstanbulda Azərbaycan, Türkiyə və İran xarici işlər nazirlərinin altıncı üçtərəfli görüşü keçirilib. Görüşün nəticəsi olaraq üç ölkənin xarici işlər nazirləri tərəfindən imzalanmış İstanbul bəyannaməsində beynəlxalq hüququn prinsipləri, xüsusilə də suverenlik, ərazi bütövlüyü, beynəlxalq səviyyədə tanınmış sərhədlərin toxunulmazlığına hörmət və dəstək, Ermənistan-Azərbaycan Dağlıq Qarabağ münaqişəsinin bu prinsiplər əsasında həllinə dair qəti və prinsipial mövqe bir daha təsbit olunub.
Kənan Eynuroğlu
