"700 bal toplayan 29 nəfərin 15-i birinci qrupla bağlıdır. Bu o deməkdir ki, Dövlət İmtahan Mərkəzi (DİM) imtahanları istədiyi kimi idarə edir”.
Bunu "Sherg.az”a tanınmış təhsil eksperti Nabatəli Qulamoğlu söyləyib.
O diqqətə çatdırıb ki, DİM-in Direktorlar Şurasının sədri Məleykə Abbaszadənin açıqlamalarının arxasında məhz bu fikir dayanır:
"Əslində isə suallar standart şəkildə salınmalı, bütün qruplar üçün çətinlik dərəcəsi eyni cür olmalıdır. DİM ilk mərhələdə mübahisəli sualları test tapşırıqları sırasına daxil edib. Apelyasiya Komissiyaları isə sadəcə görüntü üçün yaradılıb. Mən elə bu faktlarla bağlı geniş məqalələrlə çıxış etdim, əlimdə konkret sübutlarım da var. II-III qrupların imtahanından sonra mübahisəli məqamlar ortaya çıxdığına görə, DİM I qrupun test tapşırıqlarında dəyişiklik etdi. İkinci mərhələdə də bu proses davam etdiyinə görə, I qrup imtahanları rahat keçdi. Abituriyentlərin yüksək bal topladığını görən, DİM ekspertləri digər qrupların test tapşırıqlarını çətinləşdirib, abituriyentləri sıxmağa başladılar. Nəticədə, ikinci mərhələdə II qrupdan cəmi 1 nəfər 700 bal topladı. Ona görə, hesab edirəm ki, DİM-in açıqladığı statistika, irəli sürdüyü fikirlər qurumun özünün mənafeyinə hesablanıb”.
2019-cu ildən qəbul imtahanlarının yeni imtahan modelinə uyğun keçiriləcəyini xatırladan N. Qulamoğlu yeni modelin təhsilin səviyyəsində müəyyən dəyişiklik yaradacağına inanmır:"Mütləq şəkildə islahatlar aparılmalı, təhsilin səviyyəsi bu şəkildə yüksəldilməlidir. Yeni modelin hələlik açıqlanan hissələrinə nəzər saldıqda aşağı səviyyədə olduğu görünür. Bu imtahan modelinin abituriyentlər üçün zərərləri çox olacaq. Bundan sonrakı 2-3 il ərzində qəbul prosesində uğurlar qazanılacağına inanmıram. İstənilən halda bu proses kurikulum proqramına uyğun işlənilib və sona çatdırılmalıdır. Amma yeni imtahan modelindən gözləntilərimiz böyük deyil”.
Qeyd edək ki, M. Abbaszadənin sözlərinə görə, 2017-ci ildən abituriyentlərin ali təhsil almaq imkanlarını artırmaq məqsədilə qaydalarda dəyişikliklər edilməsi abituriyentlərin nəticələrinə ilbəil öz müsbət təsirini göstərib. DİM sədri nümunə olaraq, bu il 700 bal toplayan abituriyentlərin rekord sayda – ümumilkdə 29 nəfər olduğunu diqqətə çatdırıb.
Aysel Aslan
