"Bu il keçirilən buraxılış imtahanlarında bəzi texniki səhvlər oldu”.
Bunu "Sherg.az”a tarix elmi üzrə fəlsəfə doktoru, təhsil eksperti Kamran Əsədov deyib.
Ekspert diqqətə çatdırıb ki, çapda problem yaşandığı üçün "G” variantı olan test tapşırığı verilməyib:
"Bakıda və regionlarda keçirilən buraxılış imtahanlarının test nümunələrində sualların ağırlıq səviyyəsi gözlənilməmişdi. Belə ki, Bakıda keçirilən imtahanda testlərin ağırlıq səviyyəsi bir az asan, regionlarda isə çətin idi. Riyaziyyat fənnindən olan nəticələr olduqca aşağı idi. Yəni, 2008-ci ildən ölkədə tətbiq edilən kurrikulum standartının tədris prosesi hələ də özünü doğrultmur.
Hələ də orta məktəb məzunlarımız yeni tipli test tapşırıqlarını cavablandırmaqda çətinlik çəkirlər. Ona görə ki, məktəb direktorları tədris proseslərini dövlət standartlarına uyğun qura bilməyiblər. Təəssüflər olsun ki, bu məsələdə Təhsil Nazirliyi də müəyyən qədər zəif işləyir.
Çünki məktəblərdə monitorinq aparılmır. Təhsildə keyfiyyət dedikdə tədris ilinin əvvəlində və sonundakı qiymət meyarlarını müqayisə etməliyik. Amma təəssüf ki, ortalıqda belə müqayisə yoxdur. Həm 9-cu, həm də 11-ci siniflərdə riyaziyyat fənni üzrə qiymətlər standartlardan olduqca aşağıdır”.
Ekspert ən yaxşı nəticələrin Azərbaycan dili fənni üzrə olduğunu bildirdi:
"Xarici dildə olan nəticələr də yaxşıdır. Ümumilikdə isə, bu qədər imtahan stressinin lazım olmadığını düşünürəm. Düzdür, buraxılış imtahanlarının nəticələri ali məktəbələrə qəbul olmaq üçün bal olaraq müsbət təsir göstərir. Buraxılış imtahanı eyni zamanda qəbul imtahanının birinci mərhələsi hesab olunur. Çünki buraxılış imtahanında toplanan bal qəbul imtahanındakı nəticələrə əlavə olunacaq. Ona görə də buraxılış imtahanlarının əhəmiyyəti də çoxdur".
Qeyd edək ki, aprel ayının 7-də, 14-də və 21-də 11-ci sinifləri üçün buraxılış imtahanları keçirilib.
Yeganə Bayramova
