"Bu gün Lerik rayonunda zəlzələ baş verib. Amma bunun İrandakı zəlzələ ilə əlaqəsi yoxdur”.
Bunu "Sherg.az”a İranda 4,5 bal gücündə qeydə alınan zəlzələnin Azərbaycana təsirindən danışarkən Respublika Seysmoloji Xidmət Mərkəzinin baş direktoru Qurban Yetirmişli deyib.
O vurğulayıb ki, İranda baş verən güclü zəlzələlərə baxanda bu zəlzələ hiss edilməyəcək dərəcədə zəifdir:
"Ötən gün İranda baş verən zəlzələ 4,5 bal gücündə olub. Bu, təhlükəli deyil. Azərbaycana da heç bir təsiri olmayacaq. Təsadüfi hallarda ola bilər ki, qonşu ölkələrdəki yeraltı təkanlar ölkəmizə təsir etsin. Səhər saatlarında Lerikdə 3,4 bal gücündə zəlzələ qeydə alınıb. Bu zəlzələ də hiss edilməyib və İranda baş verən zəlzələ ilə əlaqəsi yoxdur”.
Qeyd edək ki, yeraltı təkanların episentri Kirmanşah şəhərindən 49 km şimal-qərbdə, ocağı isə 40 km dərinlikdə yerləşib. Dağıntı və zərərçəkənlər barədə məlumat daxil olmayıb.
Aysel Aslan
