Türkiyənin Qaziantep şəhərində kababçı maraqlı addım atıb
Əhali arasında peyvənd olunanların faizi baxımından ən aşağı göstəriciyə sahib bölgədə birdən-birə faiz yüksəlməyə başlayıb. Bunun səbəbi bilinəndə, hər kəs yaxşı mənada heyrətə düşüb. İstifadə olunan metod hətta bəyənilib də. “Şərq” “Milliyet.com”a istinadən bildirir ki, Türkiyənin Qaziantep şəhərində bir yeməkxana sahibi peyvənd kampaniyasına əməli dəstək verib. Yeməkxana sahibi “peyvənd olunanlar, arayışla gəlsin, pulsuz kabab yesin”, elanı verib. Bunu eşidib-bilən yeməkxanaya axın edib.
Yeməkxanaya gələnlər peyvənd olunmalarına dair kart təqdim edib, pulsuz kababa qonaq olublar. Bildirilir ki, Qaziantep peyvənd olunanların sayına görə ən aşağı göstəriciyə sahib şəhərlər sırasında olub. Pulsuz kabab olayından sonra isə bu şəhərdə peyvənd vurduranların sayı əməlli-başlı artmağa başlayıb.
Yeməkxana sahibinin bu addımı bir tərəfdən peyvənd kampaniyasına dəstəkdirsə, bir tərəfdən də sahibkarların ziyana düşməməsi üçün atılan addımdır.
Məlum məsələdir ki, yoluxma sayı artdıqda, hökumət sərt karantin tədbirlərinə əl atır, yeməkxanalar, restoran və kafelərin fəaliyyəti dayandırılır. Yeməkxana sahibi pulsuz kabab təklif etməklə, həm də sahibkarlıq maraqlarını qorumuş olur.
Yeməkxana sahibi Erkan Ayık pulsuz kabab kampaniyasını bu məqsədlə təşkil etdiyini, yoluxma sayının artmasından ən çox qida sektorunun zərər gördüyünü bildirib.
