Keçən illə müqayisədə bu il yol qaydalarını pozanların sayı artıb. Ölkəmizdə yol hərəkəti qaydalarının əleyhinə aşkarlanmış inzibatı xətaların sayı 2017-ci ilin müvafiq dövrünə nisbətən 4.1 faiz artıb. Ümumilikdə 34 milyon manatdan çox cərimələr yazılıb.
Sürücülərin 99 faizi isə qayda pozuntusunda özlərini günahkar hesab etmirlər. Onlar ölkəmizdə yol infrastrukturunun düzgün qurulmadığını əsas gətirərək, bəzi yerlərdə yol nişanlarının, sürət həddinin, dayanma və durma qaydaları ilə bağlı müvafiq göstəricilərin səhv quraşdırıldığını iddia edirlər.
Azərbaycan Texniki Universitetinin Avtomobil daşımaları və yol hərəkətinin təşkili kafedrasının dosenti, nəqliyyat üzrə ekspert Fərhad Eyyubov "Sherg.az”-a açıqlamasında bildirib ki, yol hərəkəti qaydalarının pozulmasının əsas səbəblərindən biri, nəqliyyat vasitələrinin, sürücülərin günü-gündən artmasıdır: "Hər bir sürücü bəlkə yüz dəfələrlə yol hərəkəti qaydalarını pozur. Elə yerlər var ki, orda qaydaların pozulduğu hiss olunmur, yəni, xüsusi radar sistemi, müşahidə kameraları bunu görmür və ya DYP əməkdaşları qayda pozuntusunu hiss eləmir. Ona görə müvafiq yerlərdə qayda pozuntuları baş verir. Məsələn, düz xətti keçmək, dönmək, ötmə qaydaları və s. qayda pozuntuları var ki, xüsusi kameralar vasitəsilə müşahidə olunur və protokllar yazılır. DYP əməkdaşları qayda pozuntusunu görür və bunun haqqında məlumatlar verirlər. Deməli, bizim gördüyümüz yol hərəkəti qaydalarının sayı yalnız qeydə alınmış qayda pozuntularıdır. Bəlkə də yol hərəkəti qaydaları 5 dəfələrlə çox pozulur ki, bunlar da müşahidə olunmur və ya görünmür”.
F.Eyyubov bildirib ki, ölkəmizdə nəqliyyat pərakəndə bir sektora bölünüb. Ən çox yol hərəkəti qaydalarını pozanlar şəxsi avtomobili olan sürücülərdir:
"Müşahidə zonası, yəni, radarlar vasitəsilə və ya DYP-nin özünü müşahidəsi vasitəsilə görünür ki, hadisələrin sayı artıb. Keçən ilə baxanda bu il protokolların çoxu xüsusi radar vasitəsilə müəyyənləşdirilib. Elə radarlar var ki, yeni qurulub. Məsələn, Bakı-Şamaxı 102 kilometrinə qədər yol yeni yoldur və orda yeni radarlar quraşdırıblar. Əsas məsələ odur ki, radarların artımı mütləq lazımdır, insanların maariflənməsi lazımdır. Vətəndaşlar bu məsələyə biganə yanaşmamalıdır, çünki hər bir yol hərəkəti qaydası sabah ola bilsin, ağır nəticələrə səbəb ola bilər. Ona görə də bu sahədə geniş formada maariflənmə işi aparılmalıdır.
Yeganə Bayramova
