"Ermənistan dövlətinin də, Dağlıq Qarabağ münaqişəsinin də yaranması Rusiyanın Qafqaz siyasətinin tərkib hissəsidir. Şimal qonşumuzda hakimiyyətlər, liderlər dəyişsə də, ruslar bu siyasətdən imtina etməyəcəklər”.
Bu barədə "Sherg.az”a Rusiyanın Azərbaycandakı yeni səfiri Mixail Boçarnikovun "Rusiya Qarabağ münaqişəsinin həllinə köməyini davam etdirəcək" iddiasına münasibət bildirərkən Azərbaycan Demokrat Partiyasının (ADP) sədri Sərdar Cəlaloğlu bildirib.
O qeyd edib ki, Çar Rusiyası, Sovet hökuməti və hazırkı Rusiya Federasiyası Azərbaycan xalqına qarşı eyni siyasəti həyata keçirir:
"Ermənistan Rusiyanın əlində bölgədəki durumu nəzarətdə saxlamaq üçün alətdir. Ermənilərdən bütün region ölkələrinə - Türkiyə, Gürcüstan və Azərbaycana qarşı istifadə ediblər. M. Boçarnikovun fikirləri, Rusiyanın ATƏT-in Minsk qrupu çərçivəsində Dağlıq Qarabağ münaqişəsinin həllinə köməyini davam etdirəcəyi barədə açıqlamaları siyasi gedişdir. Rusiya rəsmisi belə açıqlama verməklə rəsmi Moskvanın əsl niyyətini gizlədir. Yəni, bu o deməkdir ki, Rusiya bundan sonra da Dağlıq Qarabağ münaqişəsinin həll olunmasına imkan verməyəcək”.
S.Cəlaloğlunun fikrincə, Dağlıq Qarabağ münaqişəsində mövcud olan status-kvo bundan sonra da uzun müddət saxlanacaq:
"Ya gərək Rusiyada güclü çöküş baş verə, ya da Azərbaycan Türkiyə ilə konfederasiya yaradıb, daha ciddi gücə çevrilə, öz dövlət maraqlarını müdafiə edə. Daxili və xarici siyasətdə düşünülmüş, məntiqli addımlar atmağımız mütləqdir".
Qeyd edək ki, M. Boçarnikovun sözlərinə görə, Rusiyanın məqsədi münaqişə tərəflərinə hərtərəfli kömək göstərməkdir: "Çalışırıq ki, onlar öz aralarında razılığa gələ bilsinlər. Münaqişə tərəfləri üçün məqbul olan bizim üçün də məqbuldur".
Aysel Aslan
