Ukrayna Prezidenti Vladimir Zelenski sentyabr ayının sonuna qədər Rusiya və Ukrayna arasında hər an gərginliyin baş verə biləcəyini mümkün hesab edir.
APA-nın xəbərinə görə, bu barədə V. Zelenski Almaniyanın “Frankfurter Allgemeine Zeitung” nəşrinə müsahibəsində bildirib.
“Biz dəqiq rəqəmləri bilirik. Eskalasiya zamanı müvəqqəti işğal olunmuş Donbass ərazilərində 30-35 min hərbi qüvvə vardı. Ukrayna və Rusiya sərhədləri boyunca müxtəlif dövrlərdə 50-80 min, Krım ərazisində isə təxminən 33-35 min hərbçi qeydə aldıq. İşğal olunmuş ərazilərdəki hərbçilərin 30-35 mini separatçı qoşun idi, üstəlik üç minə yaxın rus zabiti vardı”, - deyə Ukrayna Prezidenti qeyd edib.
Onun sözlərinə görə, Avropanın və ABŞ-ın Rusiyaya təzyiqindən sonra gərginlik nisbətən azalıb.
Ukrayna lideri vurğulayıb ki, ilhaq olunmuş Krım torpaqlarından 3500 Rusiya hərbçisi geri çəkilib: “Digərləri yerində qalır. Bütün hərbi avadanlıqların 90%-i yerindədir. Buna görə də düşünürəm ki, sentyabr ayının sonuna qədər, daha dəqiq deyim, 12-16 sentyabr tarixinədək istənilən vaxt gərginlik mümkündür. Rusiyanın “Qərb-2021” hərbi təlim keçirəcəyini də bilirik. Vəziyyət çox təhlükəlidir”.
