Yunanıstanın mərkəzi rayonlarında Rixter cədvəli üzrə 5,3 bal gücündə zəlzələ olub.
AZƏRTAC Reuters agentliyinə istinadla xəbər verir ki, yerli vaxtla 10:46-da baş vermiş yeraltı təkanların episentri ölkənin cənub-qərbində yerləşən Qalaxidi şəhərindən 8 kilometr aralıda olub. Afina Geodinamik İnstitutunun məlumatına görə, son zamanlar bu ərazidə yeraltı təkanların intensivliyi artıb. Buradan 129 kilometr məsafədə yerləşən paytaxt Afinada da zəlzələ hiss edilib.
Avropa-Aralıq dənizi Seysmoloji Mərkəzinin məlumatına görə, Peloponnesdən 51 kilometr məsafədə yerləşən Patras şəhərində də güclü yeraltı təkanlar qeyd alınıb.
Tələfat və dağıntılar barədə məlumat verilmir.
