"Bir insanın ildə neçə dəfə qan verə biləcəyi tibbi normalar və insan orqanizminin bioloji xüsusiyyətləri nəzərə alınaraq qanunvericiliklə və klinik protokollarla tənzimlənir".
"Medicina" xəbər verir ki, bu barədə Səhiyyə Nazirliyi Respublika Qan Bankının həkim-terapevti Günel Əliyeva bildirib.
Qanvermə intervalı kişilərdə hər üç aydan bir olmaqla ildə dörd dəfə, qadınlarda isə dörd ay fasilə ilə ildə üç dəfə olmalıdır:
"Bu fərq fizioloji səbəblərlə, xüsusilə qadınlarda aylıq menstrual qan itkisi və ümumi hemoqlobin ehtiyatlarının fərqliliyi ilə izah olunur. Plazma donorluğuna gəlincə, plazma donorları ildə 12-15 dəfəyə qədər plazma verə bilərlər, aralıq isə ən azı iki həftə olmalıdır. Bu prosesdə yalnız plazma alınır, digər hüceyrələr geri verilir. Buna görə də bədən daha tez bərpa olunur. Trombosit donorluğuna isə ildə 10-12 dəfə icazə verilir".
"Çəkisi 50 kq və boyu 150 sm-dən artıq olan şəxslərin donorluğuna icazə verilir. Mütləq ilkin həkim müayinəsi (qan təzyiqi, hərarət, çəki, antropometrik göstəricilər, anamnestik sorğu) və laborator test (HB səviyyəsi kişilərdə 135-180, qadınlarda 125-165 q/l) aparılır. Kriteriyalara uyğun şəxslər donor ola bilərlər. Donorluğa mütləq və nisbi əks-göstərişlər var. Bunu donoru müayinə edən həkim müəyyən edir, donorluqdan kənarlaşdırma və ya donorluğa icazəni də o müəyyən edir".
