Bakıda ət doğrayan kişi özünü bıçaqlayıb.
Oxu.Az-ın məlumatına görə, hadisə paytaxtın Xətai rayonu ərazisində baş verib.
Xətai rayonu, Ə.Şıxlinski küçəsi, ev 14-də yaşayan 1969-cu il təvəllüdlü İbrahim Əziz oğlu Ələkbərov ət doğrayarkən ehtiyatsızlıqdan qarın nahiyəsinə bıçaqla xəsarət yetirib.
Xəstəxanaya yerləşdirilmiş İ.Ələkbərovun vəziyyəti qənaətbəxşdir.
Təhlükəsizlik eksperti Samir Nəbiyev “Sherg.az”a bildirdi ki, ət doğrama və kəsim məntəqələrində xüsusi avadanlıqlar və bıçaqlar olmalıdır:
“Bununla yanaşı, həmin ərazidə fəaliyyət göstərən ət kəsicisinin və ət doğrayan şəxsin vəzifə təlimatı hazırlanmalı və orada əməyin mühafizəsi və texniki təhlükəsizliklə bağlı müddəalar əks olunmalıdır. Bu tədbirlər çərçivəsində müvafiq nəzarət mexanizmləri həyata keçirilməlidir. Fərdi mühafizə vasitələri xüsusi qoruyucu vasitələrdən ibarət olmalı, məsələn, kəsilməyə davamlı əlcək, deşilməyə davamlı xüsusi önlük təmin edilməlidir. Bununla yanaşı, qida təhlükəsizliyi tələbləri də nəzərə alınmalı, baş örtüyü, qoruyucu eynək və respiratordan istifadə edilməlidir. Bu zaman bədənin əzələ hissələrinin təxminən 90–95%-i tam şəkildə örtülməli, yalnız üç nahiyədə müəyyən qədər açıq sahələr qala bilər. Digər bütün nahiyələr mütləq şəkildə qorunmalı və yalnız bundan sonra kəsim və doğrama prosesinə başlanmalıdır. Böyül ehtimal ilə qeyd edilən ərazidə müvafiq təlimat və fərdi mühafizə vasitələri mövcud olmayıb. Nəticədə, ət doğrama prosesini icra edən şəxs özünə xəsarət yetirib”.
