Bərdədə bədbəxt hadisə baş verib.
APA-nın yerli bürosu xəbər verir ki, rayonun Mollalı kəndində 1964-cü il təvəllüdlü Fehruz Salahovu elektrik cərəyanı vurması nəticəsində ölüb.
Məlumata görə, hadisə elektrik naqili ilə ehtiyatsız davranma nəticəsində baş verib.
Fakt araşdırılır.
Təhlükəsizlik məsələləri üzrə ekspert Elmar Nurəliyev “Sherg.az”a bildirdi ki, elektrik təsərrüfatında təmir, texniki xidmət və ya yerdəyişmə işləri yalnız bu sahədə ixtisaslaşmış müəssisələr tərəfindən həyata keçirilməlidir:
“Bu işləri yerinə yetirən şəxslər mütləq ixtisaslı mütəxəssislər olmalı, sırf təcrübə və ya şəxsi bilik əsasında müdaxiləyə yol verilməməlidir. Elektrik təsərrüfatında təhlükəsizlik qaydalarının pozulması bədbəxt hadisələrin baş verməsinə səbəb ola bilər. Buna görə təhlükəsizlik tələblərinə ciddi şəkildə əməl olunmalıdır. İstifadəyə yararsız və nasaz elektrik şəbəkələrindən istifadə edilməməli, nasazlıqlar aradan qaldırıldıqdan sonra şəbəkə yenidən istismara verilməlidir. Təhlükəsizlik qaydalarının pozulması cərəyan vurması və ya yanğın riski ilə nəticələnə bilər. Məişət şəraitində də elektrik təsərrüfatının texniki cəhətdən saz vəziyyətdə saxlanılması mühüm əhəmiyyət kəsb edir. Bütün baxış və diaqnostika tədbirləri ixtisaslaşmış müəssisə tərəfindən aparılmalı, aşkar olunan nasazlıqlar operativ şəkildə aradan qaldırılmalıdır. Elektrik şəbəkəsinin normadan artıq yüklənməsinin qarşısı alınmalı və yalnız keyfiyyətli naqillərdən istifadə edilməlidir. Nasaz və köhnəlmiş naqillərin istifadəsi qəbuledilməzdir”.
