Türkiyənin Qaziantep şəhərindən olan 64 yaşlı Halil Taş 20 il əvvəl İstanbulda valyutadəyişmə məntəqəsindən aldığı səhv çap edilmiş 100 dollarlıq əskinası satışa çıxarıb.
Sherg.az türk mediasına istinadən xəbər verir ki, əvvəlcə 100 dollarlıq əskinasın saxta olduğunu düşünən Taş, pulu aldığı valyutadəyişmə məntəqəsi də daxil olmaqla, bir çox valyutadəyişmə məntəqəsində pul sayan maşından keçirib. Pulun orijinal olduğunu və səhv çap olunduğunu anlayıb. 64 yaşlı Halil Taş 20 il əvvəl tapdığı dollara görə o zaman min dollar təklif aldığını bildirib. İndi isə onu kolleksiyaçılara satacağını düşünür.
Halil Taş, “İstanbuldakı valyutadəyişmə məntəqəsindəki pulların arasından çıxdı. Heç kim almadı, mən də alıb gizlətdim. 20 ildir məndədir. Pulun saxta olub-olmadığını öyrənmək üçün İstanbul və Qaziantepdəki valyutadəyişmə məntəqələrində sınaqdan keçirdik və saxta olmadığı üzə çıxdı. ABŞ Federal Ehtiyat Sistemi səlahiyyətlilərinin açıqlamasına görə, səhv çap edilib və onlardan biri məndədir. Bu sikkənin ən mühüm xüsusiyyəti onun bir tərəfinin çap edilməməsidir" deyə bildirib.
Əskinası maraqlanan antikvar satıcılarına və kolleksiyaçılara satacağını ifadə edən Taş daha sonra deyib:
“Bu günə qədər heç bir yerdə qiymətləndirmə etməmişəm. Hazırda Türkiyədə yalnız məndə olduğunu düşünürəm. 20 il əvvəl bu sikkəyə min dollar təklif etdilər və daha dəyərli olacağını düşündüyüm üçün vermədim. Saxlamışam, mən istəyən paranı verənə satacam. Bəlkə 30, bəlkə 50, bəlkə də 100 min dollar dəyərindədir."
