Azərbaycanda informasiya texnologiyaları və internet infrastrukturunun təhlükəsizliyi sahəsində beynəlxalq təcrübəyə uyğun yeni dövlət standartlarının hazırlanması istiqamətində işlər görülür.
Bu barədə “APA-Economics”ə açıqlamasında Azərbaycan Standartlaşdırma İnstitutunun baş direktor vəzifəsini müvəqqəti icra edən Kəmalə Məmmədzadə deyib.
O qeyd edib ki, bu vaxta qədər informasiya təhlükəsizliyi ilə bağlı tətbiq edilən standartlar artıq aktual deyil, informasiya təhlükəsizliyi üçün kifayət etmir və müasir texnoloji çağırışlara cavab vermir:
"Hazırda biz bu sahədə daha geniş əhatəli və müasir tələblərə uyğun standartlar hazırlayırıq. Bu standartlar yalnız İT infrastrukturu ilə məhdudlaşmır, həm də xidmət sahələrini, internet bağlantılarını, informasiya axınını və provayderləri əhatə edir".
İnformasiya texnologiyaları üzrə mütəxəssis Elvin Həsənov “Sherg.az”a bildirib ki, Azərbaycanda informasiya təhlükəsizliyi ilə bağlı yeni dövlət standartlarının hazırlanması çox vacib addımdır:
“Çünki bu sahədə əvvəlki qaydalar artıq dövrün tələblərinə qismən tam cavab vermirdi. Texnologiyalar sürətlə inkişaf edir və süni intellekt, uzaqdan iş, bulud sistemləri və onlayn xidmətlər həyatımıza daxil olub. Bu da yeni təhlükələr yaradır. Köhnəlmiş standartlarla bu təhlükələrə qarşı mübarizə aparmaq çətindir. Yeni standartlar isə bu boşluqları aradan qaldıra bilər. Məsələn, məlumatların necə qorunmalı olduğu şifrələmə qaydaları, kimlərin hansı sistemlərə giriş icazəsi ola biləcəyi, hücum baş verərsə necə reaksiya verilməli olduğu kimi məsələlər daha dəqiq və müasir tələblərə uyğun müəyyən olunacaq. Amma standartların tətbiqi təkcə sənədlərin hazırlanması ilə bitmir. Effektiv nəticə üçün konkret nəzarət mexanizmləri yaradılmalıdır. Məsələn bütün dövlət qurumlarında informasiya təhlükəsizliyi üzrə məsul şəxslərin təyin olunması, mütəmadi auditlərin keçirilməsi, insidentlərin real vaxt rejimində izlənməsi və təhlili, habelə kritik informasiya infrastrukturuna dair müstəqil nəzarət orqanının fəaliyyət göstərməsi bu sahədə dayanıqlığı təmin edə bilər”.
