Polşa Müdafiə Nazirliyi Almaniya ilə birgə sərhəd patrullarının yaradılmasına dair təklifi rədd edib.
Teleqraf xəbər verir ki, bu barədə "Polskie Radio 24" məlumat yayıb.
Polşa müdafiə naziri Vladislav Kosinyak-Kamış Almaniya Daxili İşlər Nazirliyinin rəhbəri Aleksandr Dobrindtin Polşa-Almaniya sərhədində birgə nəzarət tətbiqi ideyasını qəti şəkildə rədd etdiyini bildirib.
"Xeyr, yox. Birgə patrullar olmayacaq. Alman tərəfində alman patrulları, Polşa tərəfində isə Polşa patrulları olacaq. Almaniyadan olan nazir bizə Polşada nə edəcəyimizi deməyəcək", - deyə Kosinyak-Kamış bəyan edib.
Qeyd edək ki, bundan əvvəl Polşanın Baş naziri Donald Tusk da sərhəd təhlükəsizliyi ilə bağlı narahatlığını ifadə etmişdi. O, Almaniya və Litva ilə müvəqqəti sərhəd nəzarətinin tətbiq edildiyini elan etmiş və Almaniya rəsmilərinə Polşanın səbrinin tükəndiyini bildirmişdi.
Baş nazir vurğulamışdı ki, görülən tədbirlər Polşa vətəndaşlarının maraqlarını qorumağa və mümkün mənfi nəticələrin qarşısını almağa yönəlib. Hələ may ayında Polşa, Almaniyadan qeyri-qanuni miqrantların daşınması davam edərsə, sərhədi bağlamağa hazır olduğunu bəyan etmişdi.
