“Avropanın 2030-cu ilə qədər yenidən silahlanması lazımdır, onun vaxtı daralır.”
Bunu Danimarkanın baş naziri Mette Frederiksen deyib.
"Biz Avropanın 2030-cu ildən gec olmayaraq yenidən silahlanması ilə bağlı ümumi hədəfi həyata keçiririk. Bunu Ağ Kitabda açıq-aydın qeyd edirik. Açığı, vaxtımız tükənir", - o deyib.
O həmçinin xatırladıb ki, Danimarka 2025-ci il iyulun 1-dən Aİ Şurasına sədrlik edəcək. Bu zaman yenidən silahlanma məsələsi ölkə üçün prioritet olacaq.
"Bunun üçün biz Avropada hərbi sənayeni bərpa etməliyik. Almaniya burada əsas rol oynayacaq ki, biz indikindən daha çox və daha sürətli istehsal edə bilək", - o bildirib
Politoloq Taleh Əliyev Sherg.az-a bildirib ki, 2030-cu il təkcə Avropa üçün deyil, dünya üçün də böyük bir müharibəyə hazırlıq dövrü kimi qiymətləndirilir:
"Xüsusilə Türkiyə, 2029-cu ilə qədər yeni nəsil silahların Silahlı Qüvvələrə qəbulunu hədəfləyir. Böyük Britaniya, ABŞ, Yaponiya, İtaliya və digər ölkələr də 2030-cu ilə qədər ordularını müasirləşdirmək və ən son hərbi texnologiyalarla təchiz etmək planlarını açıqlayıblar. Bütün bu proseslər göstərir ki, ehtimal edilən Üçüncü Dünya Müharibəsi və ya qlobal bir qarşıdurma 2030-cu ildə baş verə bilər. Əslində istər Rusiya-Ukrayna cəbhəsində hadisələrin gedişi, istər Yaxın Şərqdə İsraillə İran arasındakı hərbi qarşıdurma, o cümlədən Uzaq Şərqdə Çin-ABŞ gərginliyinin getdikcə artmasının tarixi önə çəkməsi ehtimalı da var. Hər halda 2030-cu illə bağlı hədəflərini elan edən dövlətlər, Avropa strukturları bu sahədə kifayət qədər məlumatlı olan şəxslərdir".
Politoloq əlavə edib ki, Danimarka Baş nazirinin açıqlamasını Avropa dövlətlərinin hazırlıq prosesi kimi qiymətləndirmək olar:
"Aİ Şurasına hansı ölkənin rəhbərlik etməsindən asılı olmayaraq bütövlükdə baş verəcək təhlükənin qarşısını almaq üçün Avropanın aparıcı dövlətlərinin müəyyənləşdirdiyi ümumi müdaxilə strategiyası ön plana çıxacaq".
