BMT-nin İnsan Haqları üzrə Ali Komissarlığı (OHCHR) Ukraynanın hərbi əsirlərin foto və videolarını yaymaq təcrübəsini beynəlxalq humanitar hüququn pozuntusu kimi qiymətləndirib.
Teleqraf xəbər verir ki, bu barədə OHCHR-in Ukraynada insan haqlarının vəziyyətinə dair 2024-cü ilin dekabrından 2025-ci ilin mayına qədər olan dövrü əhatə edən son hesabatında qeyd olunub.
Bildirilir ki, Ukraynada əsir götürülmüş hərbçilərin şəkil və videolarının həm dövlət orqanları, həm də media tərəfindən yayılması faktları sənədləşdirilib.
Hesabatda vurğulanır ki, beynəlxalq humanitar hüquq hərbi əsirləri ictimai maraqdan qorumağı nəzərdə tutur. Bu, onların şəxsi məlumatlarının, o cümlədən görüntülərinin, dindirmə materiallarının və digər məlumatların yayılmaması deməkdir.
Sənəddə, həmçinin qeyd olunur ki, hərbi əsirlərin şəxsiyyətlərinin açıqlanması onların vətənlərinə qayıtdıqdan sonra təhlükə ilə üzləşmələrinə və ailələrinin mənfi nəticələrlə qarşılaşmasına səbəb ola bilər.
