Keniyanın paytaxtı Nayrobidə tanınmış bloqer və ictimai fəal Albert Odcvanqın həbsxanada qəfil ölümü ilə bağlı genişmiqyaslı etiraz aksiyaları başlayıb.
Oxu.Az-ın rg.ru-ya istinadla verdiyi məlumata görə, etirazçılar onun ölümündə polis əməkdaşlarını günahlandırırlar.
Sosial şəbəkələrdə yüzminlərlə izləyicisi olan Odcvanq hüquq-mühafizə orqanlarındakı korrupsiyanı tənqid edən yazıları ilə tanınırdı. Onun "nifrət yaymaq" ittihamı ilə həbs edildiyi bildirilir.
Etirazçılar polis idarəsinə və Milli Assambleyaya hücum etməyə cəhd göstəriblər.
Polis gözyaşardıcı qazdan istifadə edərək aksiyanı dağıdıb. Bir neçə avtomobil yandırılıb, şəhərin mərkəzində gərginlik davam edir.
Aksiyanın əsas tələblərindən biri - bloqerin təqibində günahlandırılan polis rəsmisi, Baş Polis Müfəttişinin müavini Eliud Laqatın dərhal istefasıdır.
Ekspertlər qarşıdurmaların bir neçə gün davam edə biləcəyini istisna etmirlər.
