Rusiyada qeyri-qanuni yaşayan miqrantlar aprelin 30-dək ölkəni tərk etməli və ya hüquqi vəziyyətini tənzimləməlidir.
Oxu.Az TASS-a istinadən xəbər verir ki, bu, Rusiya Prezidenti Vladimir Putinin qeyri-qanuni miqrantların ölkədən çıxarılması haqqında qanunun tətbiqi ilə imzaladığı fərmandan irəli gəlir.
Avqustda imzalanmış qanuna əsasən, ölkədən çıxarılma rejimi 2025-ci il fevralın 5-dən tətbiq ediləcək.
Rusiyanı tərk etmək tələbi qanuni olaraq qalmaq istəyən və bir sıra şərtlərə cavab verən - biometrik yoxlamadan, narkotik və infeksiyalara dair testdən keçmiş, rus dilini, Rusiya tarixini və qanunlarını bilməsi ilə bağlı sənədlər təqdim etmiş və borclarını ödəmiş əcnəbilərə şamil edilməyəcək.
Rusiya Silahlı Qüvvələrində və ya hərbi birləşmələrində xidmət müqaviləsi bağlamış əcnəbilər üçün qaydalar yumşaldılacaq. Onlar barəsində deportasiya, readmissiya, Rusiyaya daxil olmağa icazənin verilməməsi, Rusiyada qalmanın arzuolunmazlığı, müvəqqəti yaşama müddətinin azaldılması haqqında əvvəllər qəbul edilmiş qərarlar ləğv edilir.
Sənəd yanvarın 1-dən qüvvəyə minir.
