Böyük Britaniya və Almaniya xarici təhdidlər zamanı qarşılıqlı yardım haqqında irimiqyaslı saziş imzalamağa hazırdır.
Bu barədə “Politico” qəzeti mənbələrə istinadla məlumat yayıb.
Mənbə bildirib ki, 18 raund danışıqların nəticəsi olaraq hazırlanmış saziş layihəsinin mətni başa çatmağa yaxındır. Sənədin iyulun 17-də imzalanması gözlənilir.
Sazişin əsas bəndlərindən biri ötən ilin oktyabrında Britaniyanın paytaxtında imzalanmış bu sahədə ikitərəfli “Üçlük Evi” sazişinə uyğun olaraq müdafiə tərəfdaşlığına aiddir. Orada bildirilir ki, bir ölkə üçün hər hansı strateji təhlükə digəri üçün təhlükə sayılacaq.
Politoloq Taleh Əliyev Sherg.az-a deyib ki, Böyük Britaniya və Almaniya bu gün Avropa İttifaqının, NATO-nun, o cümlədən "Böyük Yeddiliyin" içərisində yer alan aparıcı dövlətlərdəndir:
"Demək olar ki, hər iki ölkənin hazırkı təhlükəsizlik baxışları, dünya siyasətinə münasibətdə mövqelərində yaxınlıq üstünlük təşkil edir. Getdikcə gərginləşən, İkinci Dünya müharibəsindən sonra formalaşan beynəlxalq münasibətlər sisteminin tamamilə sıradan çıxması, xüsusilə Rusiyanın Ukraynanın ərazilərini işğalı fonunda Avropa üçün təhlükəsizlik məsələsi ciddi önəm daşıyır. Bu baxımdan sözügedən saziş Avropa ölkələri, bütövlükdə kollektiv Qərbin gələcək təhdidlərdən və risklərdən qorunması üçün mühümdür".
