Ankara Ukrayna üzrə danışıqların İstanbulda keçirilməsi planlaşdırılan üçüncü raundunun tarixi ilə bağlı Kiyev tərəfinin cavabını gözləyir.
Bu barədə Türkiyə xarici işlər naziri Hakan Fidan Braziliyada keçirilən BRICS sammitindən sonra "TRT HABER"ə telekanalına açıqlamasında deyib.
“Rusiya danışıqların üçüncü raunduna hazır olduğunu bildirib. İndi isə biz Ukrayna tərəfinin cavabını gözləyirik”, – nazir vurğulayıb.
Fidan əlavə edib ki, Türkiyə Ukrayna münaqişəsinin həlli üzrə liderlərin görüşünü keçirməyə də tam hazırdır: “Türkiyədə liderlərin görüşünün təşkili ilə bağlı heç bir problem yoxdur".
Politoloq Elçin Xalidbəyli Sherg.az-a deyib ki, Türkiyənin vasitəçiliyi ilə İstanbulda keçirilən Rusiya-Ukrayna görüşləri uğursuzluqla nəticələnib:
"Bunun əsas səbəbkarı isə məhz Rusiyadır. Çünki Kreml, demək olar ki, həyata keçirilməsi mümkün olmayan tələblər irəli sürür. Həmçinin Rusiya Ukraynanın ərazilərini öz sərhədləri daxilinə qatmaq niyyətindədir. Həmçinin Rusiyanın məqsədi Ukraynanın ərazi bütövlüyünə edilmiş təcavüzü beynəlxalq aləmdə leqallaşdırmaq və tanıtmaqdır. Ukrayna isə bu tələblərlə razılaşmır. Eyni zamanda, Qərb dövlətlərinin əksəriyyəti, xüsusilə də siyasi dairələr, Rusiyanın bu şərtlərinə qarşı çıxır və onları qəbul etmir. İndi üçüncü İstanbul görüşündən də hansısa müsbət nəticə gözləmək real deyil. Xüsusilə də Trump-Putin telefon danışığından sonra yaranmış vəziyyət vəziyyətin nə qədər böhranlı olduğunu göstərir. Çünki həmin telefon danışığından dərhal sonra Rusiya Ukraynanın iri şəhərlərini raket atəşinə tutdu. Bu isə ABŞ-a açıq şəkildə meydan oxuma kimi dəyərləndirilə bilər".
Politoloq qeyd edib ki, ABŞ prezidenti Donald Trump Rusiyanın bu davranışlarından narazı və narahat olduğunu açıq mətnlə bildirib:
"Bu isə onu göstərir ki, Trump və Putin arasında baş tutan telefon danışığında tərəflər heç bir məsələdə ortaq mövqeyə gələ bilməyiblər. Əgər vəziyyət bu cürdürsə, üçüncü İstanbul görüşündə də Rusiya və Ukrayna nümayəndələri arasında danışıqların nəticəsiz qalması tamamilə real ehtimaldır".
