Biz Tramp komandasından Rusiya ilə dialoqu bərpa etməkdə maraqlı olduqları barədə siqnallar eşidirik. Bunu Rusiya xarici işlər naziri Sergey Lavrov bildirib. Onun sözlərinə görə, Moskva Tramp administrasiyası ilə Ukrayna üzrə məsləhətləşmələrə hazırdır və Ağ Evin münaqişənin əsas səbəblərini araşdıracağına ümid edir. Lavrov qeyd edib ki, Ukrayna münaqişəsinin həlli ilə bağlı gələcək razılaşmalarda onların pozulmasının qeyri-mümkünlüyünə dair mexanizm olmalıdır.
Politoloq Tofiq Abbasov “Sherg.az”a bildirib ki, Amerikanın yeni seçilən prezidenti Donald Tramp müharibələr ilə bağlı fərqli mövqe sərgiləyir:
“Özünü müharibələrin əleyhinə olan tərəf kimi göstərməyə çalışır. Amma nə qədər səmimi olduğunu bilmək olmaz. Çünki bir tərəfdən Ukrayna müharibəsinə qarşı olduğunu bildirsə də, digər tərəfdən İranla savaş edəcəyini söyləyir. Belə davranışlar isə tipik amerikanpərəst yanaşmadır. Donald Trampın fikirləri ictimai rəyi çaşdırmağa hesablanan gedişdir. Məsələ burasındadır ki, Rusiya da özünə məxsus şəkildə Donald Trampın əsil niyyətini öyrənməyə çalışır. Burada iki qütbün qarşıdurmasının əvvəli olsa da, sonu yoxdur. Rusiyanın böyük nüvə arsenalı və Amerikanın dünyanı fəth etmək arzusu olduğca sözügedən problemlər davam edəcək. Tramp əgər sülhpərvər idisə, niyə prezidentliyinin birinci dönəmində İsrailin işğalçı siyasətini dəstəklədi, Yaxın Şərqdə dözülməz vəziyyət yaratdı, Qüdsü İsrailin paytaxtı elan etdi? Donald Tramp sistemli siyasətçi olsaydı, daha səlis və incə manevrlərlə hərəkət edərdi”.
Ekspert vurğulayıb ki, Rusiya ilə müharibənin başa çatması Amerika Birləşmiş Ştatlarının ixtiyarında olan məsələ deyil:
“Sözügedən məsələ ilə bağlı Kremlin özü qərar verməlidir. Çünki bir yandan Kreml özünü müstəqil tərzdə aparır, digər tərəfdən Trampın müharibəni dayandırması ilə bağlı fikirlərini söyləyir. Bu Rusiyanın nüfuzuna nə dərəcədə ucalıq gətirəcək məqamdır? Əgər həqiqətən də əksər ölkələr Rusiya və Ukrayna arasında savaşın davamlı olması istəyirlərsə, bunu edəcəklər. YəniTramp təklikdə qala bilər. Böyük Britaniya başda olmaqla Avropa savaşda Rusiyanın zəifləməsini istəyir. Donald Trampın prezidentlik kürsüsünə əyləşdikdən sonra davranışlarında və bəyanatlarında köklü dəyişiklik görəcəyik. Ona görə də tələsmək lazım deyil. Elə ABŞ-nin hərbi-sənaye kompleksi müharibənin uzanmasında maraqlıdır. Əgər Tramp risq edərək onların niyyətinə qarşı çıxacaqsa, özünə problem yaradacaq və Ukrayna savaşda məğlub olacaq. Zelenskinin sözügedən vəziyyətdən necə çıxacağı sual antındadır. Artıq ölkə daxilində ona böyük nifrət var”.
