“Rusiya diktatoru Vladimir Putin başa düşür ki, ölkəsində ümumi səfərbərliyin elan edilməsi federasiyanın dağılmasına gətirib çıxara bilər”.
Teleqraf xəbər verir ki, bunu Ukrayna Silahlı Qüvvələrinin Quru Qoşunlarının rəsmi nümayəndəsi İvan Timoçko deyib.
“Ümumi səfərbərlik elan etmək üçün Putinə presedent lazımdır. O, Rusiya əhalisinə səfərbərlik ehtiyacını əsaslandırmalıdır. Belə bir ssenaridə informasiya və ideoloji paradiqmanı tamamilə dəyişdirməlidirlər. Ancaq bu, rusiyalılara təsir göstərə bilməyəcək”, - o bildirib.
Timoçko əlavə edib ki, Kreml səfərbərlik elan etməmək üçün digər ölkələrdən muzdluları, miqrantları və hərbçiləri döyüşlərə cəlb etməyə çalışır:
“Kreml Rusiya əhalisinin əhval-ruhiyyəsini izləyir, anlayırlar ki, ümumi səfərbərliyin elan edilməsi Rusiyanın dağılmasına səbəb ola bilər. Putin bunu çox gözəl başa düşür və buna görə də rusları başqaları ilə əvəz etməyə çalışır. Buna görə də, Şimali Koreya hərbçiləri, əcnəbi muzdlular, eləcə də Rusiyadakı bütün miqrantları ovlayır. Bunu hərbçilərimizin bu gün əsir götürdüyü şəxslər də göstərir”.
