Ukrayna Nazirlər Kabineti ölkə ərazisinin hava hücumlarından müdafiəsini gücləndirmək məqsədilə yeni eksperimental layihəyə start verib.
Teleqraf xəbər verir ki, bu barədə məlumatı hökumətin Ali Radadakı nümayəndəsi Taras Melnıçuk özünün teleqram kanalında paylaşıb.
Layihə çərçivəsində pilotsuz uçuş aparatlarını (PUA) vurmaq üçün könüllülər Müdafiə Nazirliyinin təşəbbüsü ilə orduya cəlb olunacaqlar.
Məlumata görə, eksperimental layihə Ukrayna Silahlı Qüvvələrinin Ərazi Müdafiə Qüvvələrinə və könüllü birləşmələrə aid şəxslərin iştirakı ilə həyata keçiriləcək və maksimum iki il davam edəcək.
Melnıçuk bildirib ki, bu layihədə iştirak etmək üçün şəxslər yalnız müvafiq texniki bilik və bacarığa malik olmalıdırlar. Onlar atıcılıq imkanı PUA -lar və ya idarə olunan təyyarələr vasitəsilə düşmənin dronlarını zərərsizləşdirə biləcəklər.
Radanın deputatı Aleksiy Qonçarenko isə əlavə edib ki, hətta səfərbərliyə cəlb olunmayan şəxslər də layihədə könüllü kimi iştirak edə biləcəklər. Onlar şəxsi silah, pilotsuz uçan aparat, avtomobil və digər texniki vasitələrdən istifadə edə biləcəkləri kimi, Ukrayna Silahlı Qüvvələri tərəfindən də texnika və sursatla təmin olunacaqlar.
