Bu gün Avropa İttifaqı (Aİ) və Dünya Bankı (DB) Azərbaycan üçün Çevik Texniki Yardım Aləti (AZTAF) üzrə İnzibati Sazişi imzalayıblar.
“Report” xəbər verir ki, ümumi büdcəsi 5,25 milyon avro təşkil edən bu üçillik proqramı Aİ maliyyələşdirir, DB idarə edir.
Proqramın məqsədi Azərbaycan Hökumətinə “Azərbaycan 2030: sosial-iqtisadi inkişafa dair Milli Prioritetlərə” uyğun olaraq, məsləhət və analitik dəstəyi və potensialın gücləndirilməsini təmin etməkdən ibarətdir. Bu dəstək sosial inklüzivliyi və bağlantıları gücləndirməyə, iqtisadi islahatlara təkan verməyə, dövlət sektorunun idarəçiliyini gücləndirməyə və COVID-19-un təsirlərinin səmərəli şəkildə aradan qaldırlmasına kömək edəcək.
Sazişi DB-nin Azərbaycan üzrə meneceri Sara Maykl və Aİ-nin Azərbaycandakı nümayəndəsi Peter Mixalko imzalayıb. İmzalanma mərasimində iqtisadiyyat nazirinin I müavini Elnur Əliyev də iştirak edib.
“Bu alət Azərbaycan hökumətinin sosial-iqtisadi inkişaf gündəliyinə sürətli və əhəmiyyətli dəstəyi təmin edəcək. O, xüsusilə COVID-19-un uzun müddətli sosial-iqtisadi təsirlərinin yumşaldılmasına kömək etməklə Azərbaycan xalqına, o cümlədən ən həssas əhali qrupların fayda verəcək. Bu təşəbbüs AI və Azərbaycan arasında möhkəm tərəfdaşlığın növbəti nümayişidir. O, Aİ-nin bu yaxınlarda 2 milyard avro investisiya potensialının olduğunu açıqladığı və müvafiq Beynəlxalq Maliyyə İnstitutları ilə sıx əməkdaşlıq çərçivəsində icra olunacaq Azərbaycan üçün İqtisadi və İnvestisiya Planı ilə əlaqələndiriləcək”, - deyə P.Mixalko qeyd edib.
“Biz iddialı AZTAF proqramını icra etmək məqsədilə Azərbaycan Hökuməti və Avropa İttifaqı ilə tərəfdaşlıqdan çox məmnunuq. İnanırıq ki, o, Azərbaycana iqtisadiyyatın və institutların müasirləşdirilməsi, xidmətlərin göstərilməsi və insan kapitalının inkişafı və hamı üçün yaşıl gələcəyin qurulmasına yardım edən əsas hökumət proqramları və islahatlarını dəstəkləyəcək. Bu, bizim ölkə üzrə hazırki proqramımız üçün çox aktualdır və Azərbaycanla növbəti Ölkə Tərəfdaşlıq Çərçivəsinin hazırlanması üçün baza kimi çıxış edəcək”, – deyə S.Maykl bildirib.
AZTAF proqramı hökumətin təxirəsalınmaz prioritetlərinə cavab verən konkret fəaliyyətləri əhatə edir. Bu fəaliyyətlər hökumətin dövlət müəssisələrinin idarəçiliyi, dövlət satınalmaları, su ehtiyatlarının idarə edilməsi, “ağıllı kəndlər”, rəqəmsal inkişaf, enerji səmərəliliyi, qadınların sahibkarlıq fəaliyyəti, əlillik və inkluzivlik kimi geniş spektrli prioritetlərini dəstəkləyəcək.
