Nurayın uğur hekayəsi Türkiyənin hər yerində nümunə oldu
Türkiyənin Nevşəhər bölgəsində yaşayan Nuray Görgün, qızına gələcək qurmaq arzusu ilə başladığı çiyələk yetişdiriciliyində, cəmi 5 ildə 60 min tinglik istehsalçıya çevrildi. Yalnız 5-6 çiyələkdən başlayan bu yol, qadın əməyinin və qətiyyətinin simvoluna çevrildi.
Sherg.az xəbər verir ki, Nuray xanımın bu işə başlaması YouTube-da izlədiyi çiyələk yetişdirmə videosu ilə oldu. İlk mərhələdə 13 min 500 tinglə yola çıxan Görgün, məhsulları ilə tezliklə tanındı və ətrafında güvən qazandı. O deyir: "Əvvəlcə qızım üçün iş yeri açmaq istədim, sonra böyük sevgi ilə davam etdim."
Tarlasında özü işləyən, suvarma sistemini quran, tingləri əlləri ilə əkən Nuray xanım hər şeyi internetdən öyrənib. “Qadın qadına işləyirik” deyən Görgün, həyat yoldaşının xatirəsinə bağlı olduğu bu torpaqlarda qadın gücünün nə qədər böyük olduğunu göstərir.
Onun fəaliyyəti əvvəlcə Nevşəhər Kənd Təsərrüfatı İdarəsinin, sonra isə Kənd Təsərrüfatı və Meşə Nazirliyinin diqqətini çəkdi. “Torpağa iz buraxan qadınlar” proqramı çərçivəsində Prezident Administrasiyasına dəvət olunan Görgünün uğur hekayəsi Türkiyənin hər yerində nümunə oldu. Bu il soyuq hava səbəbindən məhsul yığımına gec başlanılıb və həftəlik 1 tona qədər olan məhsul miqdarı 600-700 kiloqram civarına düşüb.
Görgün çiyələklərinin tam təbii olduğunu vurğulayır: “Hormon istifadə etmirəm. Polis, həkim, valilər də alırlar. Soyuducuda da 1 həftə xarab olmadan qalır.”
O, kənd təsərrüfatının səbir və sevgi tələb etdiyini söyləyərək, “Səhər saat 5:30-da tarlada olmalısan. Günəşi, yorğunluğu sevməlisən. 30 yaşdan sonra da başlamaq olar. Universitet oxumaq da olar, çiyələk yetişdirmək də,” deyə qadınlara ilham verir.
