"Google"un hazırladığı yeni süni intellekt vasitəsi – “Aeneas”, Antik Roma dövrünə aid yazıların deşifrə edilməsini asanlaşdıracaq.
Sherg.az xəbər verir ki, tarixçilərlə əməkdaşlıq çərçivəsində yaradılan Aeneas, təxminən 16 milyon simvoldan ibarət 200 mindən çox tanınmış Latınca yazı üzərində öyrədilib.
Troya qəhrəmanı Aeneasın adını daşıyan bu alət, yalnız söz oxşarlıqları əsasında deyil, tarixi kontekstlərə əsasən də mətnləri təhlil edə bilir. Sistem yazıların aid olduğu dövrü və coğrafiyanı müəyyən edə, həmçinin itkin sözlər üçün təkliflər irəli sürə bilir.
“Nature” jurnalında dərc olunan araşdırmada 23 tarixçi Aeneasdan istifadə edərək yazıları təhlil edib və alət 90% dəqiqliklə məntiqli təxminlər verib. Məsələn, Avqustusun “Res Gestae Divi Augusti” adlı məşhur yazısı üzərində aparılan test zamanı alət, alimlər arasında uzun müddət müzakirə mövzusu olan iki fərqli yazılma tarixini ehtimal kimi təqdim edib.
Araşdırmanın baş müəlliflərindən olan Thea Sommerschield, Aeneasın təqdim etdiyi nəticələrə istinad edərək deyib:
“Bunlar bizim üçün ağzımızı açıq qoyan anlar idi.”
